काठमाडौं । प्रधानमन्त्री केपी शर्मा ओलीले बुढानिलकण्ठ–१, मुहानपोखरी स्थित नवनिर्मित ‘होलिडे इन रिसोर्ट’को बुधबार (२३ असोज ) समुद्घाटन गरेका छन् ।
होलिडे इन रिसोर्टको उक्त समुद्घाटन कार्यक्रममा प्रधानमन्त्री ओलीका साथै नेपाली काङ्ग्रेसका सभापति शेर बहादुर देउवा ,संस्कृति, पर्यटन तथा नागरिक उडड्यनमन्त्री बद्रीप्रसाद पाण्डे, उर्जामन्त्री दीपक खड्का लगायतको उपस्थिति रहेको थियो ।
कार्यक्रममा प्रधानमन्त्री ओलीले मनोरम ठाँउमा निर्मित सो रिसोर्टले मुलुकको पर्यटन, रोजगारी र सेवा क्षेत्र बढाउने भएकाले यसको राष्ट्रिय र अन्तर्राष्ट्रिय क्षेत्रमा प्रचारप्रसार हुनुपर्ने बताए ।
उनले पूँजीको सदुपयोग र नयाँ सोचसहित उद्यमशीलता र व्यासायिकताको विकास हुने गरी काम गर्नुपर्ने बताउँदै यस्ता होटेलले मुलुकको अर्थतन्त्रलाई चलायमान बनाउन सहयोग पुग्ने बताए । मुलुकमा दुई अन्तर्राष्ट्रिय विमानस्थललाई राम्रोसँग चलाएपछि पर्यटन क्षेत्र थप मजबुद हुने उनको भनाइ थियो ।
त्यस्तै , नेपाली काङ्ग्रेसका सभापति एवं पूर्व प्रधानमन्त्री देउवाले सुन्दर ठाउँमा स्थापित अन्तर्राष्ट्रिय चेन होटलका रुपमा रहेको सो रिसोर्टको अत्याधिक प्रचारप्रसार गरेर पर्यटक भित्र्याउनुपर्ने बताए ।
संस्कृति, पर्यटन तथा नागरिक उडड्यनमन्त्री बद्रीप्रसाद पाण्डेले नेपालको आकाश सुरक्षित छ भन्ने सन्देशसहित पर्यटन क्षेत्रको विकास गर्नुपर्ने बताए ।
उर्जामन्त्री दीपक खड्कसमेत संलग्न सो रिसोर्टका अध्यक्ष विनिता थापा खड्काले बीस रोपनी जग्गामा रु तीन अर्ब ५७ करोडको लगानीमा १०४ कोठायुक्त सो रिसोर्ट निर्माण भएको जानकारी दिइन् ।
The post ३ अर्ब ५७ करोड लागतमा निर्मित ‘होलिडे इन रिसोर्ट’ को प्रधानमन्त्री ओलीद्वारा समुद्घाटन first appeared on Khabar Breaking.
