काठमाडौं २५ मंसिर । नेपाल कम्युनिष्ट पार्टी एकीकृत समाजवादीका अध्यक्ष माधवकुमार नेपालले कम्युनिष्ट आन्दोलन बचाउने हो भने एमालेभित्र रहेका सच्चा कम्युनिष्टहरू ओलीको भ्रमबाट मुक्त हुनुपर्ने बताएका छन । उनले आफूहरुले गरेको विद्रोह एमालेको चितवनमा भएको महाधिवेशनको तमासाबाट पनि पुष्टि भएको बताए ।
उनले एमाले अध्यक्ष केपी शर्मा ओलीलाई हिटलरसँग तुलना गरेका छन् । हिटलरजस्तै ओली पनि कहिल्यै नसुध्रिने उनले बताए । समाजवादी प्रेस संगठन रुपन्देहीले शनिबार बुटवलमा गरेको पत्रकार सम्मेलनमा अध्यक्ष नेपालले ओली सुध्रिने सम्भावना नदेखेरै आफूहरुले विद्रोह गरेको बताए । हिटलरलाई श्रीमतीले समेत सुधार्न नसकेको भन्दै उनले ओलीलाई पनि कसैले सुधार्न नसक्ने बताए ।
उनले राप्रपा अध्यक्ष राजेन्द्र लिङ्देनलाई सामन्तवादको भूत जगाउने कोशिस नगर्न चेतावनी दिए । उनले राजतन्त्र संस्थागत रुपमै अन्त्य भइसकेको भन्दै त्यसलाई ब्युँताउने हो भने राणा शासन, दासप्रथा जस्ता पुराना सबै कुरा आउन सक्ने भएकाले त्यतातर्फ लाग्न नहुने बताए ।
अध्यक्ष नेपालले पाँच दलीय गठबन्धन राष्ट्रिय सभा चुनाव र उपनिर्वाचनसम्म कायम रहने बताए । उनले स्थानीय चुनाव वैशाखमा गर्ने वा तीनै तहको चुनाव एकै पटक गर्ने भन्ने विषयमा दलहरुबीच छलफल गरेर निष्कर्षमा पुगिने बताए ।
काँग्रेसको महाधिवेशनपछि सरकारका कामले गति लिने भन्दै उनले आफ्ना मन्त्रीहरुलाई गर्न सकिने काममा मात्र केन्द्रित भई जनताले अनुभूति गर्ने गरी काम गर्न निर्देशन दिएको बताए । अहिलेको प्रमुख अन्तरविरोध राजसंस्था नभई दलाल नोकरशाही पूँजीवाद भएको अध्यक्ष नेपालले बताए । दलाल पूँजीवादले समाजका सबै अंगमा विकृति विसंगति हुर्काएको र दलका नेताहरु समेत यसमा चुर्लुम्म डुबेको उनको भनाइ छ ।
