९ असोज, ललितपुर । ललितपुर महानगरपालिकाका मेयर चिरिबाबु महर्जनले महानगरपालिकालाई विपद् व्यवस्थापनमा पहिलो महानगरपालिका बनाउन चाहेको बताउनु भएको छ । ललितपुरमा बुधबार आगलागी नियन्त्रण सचेतना अभियान शुभारम्भ गर्दै उहाँले सो प्रतिबद्धता व्यक्त गर्नु भएको हो ।
मेयर महर्जनले ललितपुरको महानगर क्षेत्रमा विपद् व्यवस्थापनका लागि ४ मिनेटभित्र आवश्यक दमकल लगायतका सामग्रीहरू पुर्याई सक्नेगरी योजना तय गरिएको पनि बताउनु भयो । महानगर उद्देश्य भनेको नेपालमा रहेको २९३ वटा नगरपालिकाहरुमध्ये विपदमा ललितपुर महानगरपालिका पहिलो बनाउनु रहेको उहाँको भनाई छ ।
मेयर महर्जनले तत्काल विपद् व्यवस्थापनका लागि आफ्नो तर्फबाट गर्नुपर्ने कामहरू राम्रोसँग अघि बढाएको दाबी समेत गर्नु भयो । उहाँले विपद् व्यवस्थापनका लागि पुल्चोक दमकल सेन्टरलाई केन्द्र भागमा राखेर अन्य ठाउँमा पनि ४ वटा सवस्टेशनहरु बनाउने गरी अध्ययन गराइएको र सो कामलाई चालु आर्थिक वर्ष भित्रैबाट सुरु गर्ने समेत जानकारी दिनु भयो ।
मेयर महर्जनले ललितपुर महानगरपालिकाले आफ्नो महानगर क्षेत्र भित्रको मात्रै नभई ललितपुर जिल्लाका सबै स्थानीय तहलाई पनि विपद् व्यवस्थापनमा सहयोग गर्ने लक्ष्य लिएको पनि बताउनु भयो ।
The post ललितपुर महानगरलाई विपद् व्यवस्थापनमा ‘नम्बर वान’ बनाउने मेयर महर्जनको प्रतिबद्धता first appeared on Khabar Breaking.
