ओरियण्टल होटल्स लिमिटेडको २७औँ वार्षिक साधारण सभा सम्पन्न भएको छ । यही असोज २० गते बिहीबार ललितपुरको जावलाखेलस्थित नेपाल प्रशासनिक प्रशिक्षण प्रतिष्ठानमा कम्पनीकी अध्यक्ष सुभद्रा श्रेष्ठको अध्यक्षतामा कम्पनीको साधारण सभा सम्पन्न भएको हो ।
साधारणसभाले संचालक समितिले प्रस्ताव गरेको कम्पनीको चुक्ता पूँजीको ५ प्रतिशत बोनस शेयर र कर प्रयोजनको लागि ०.२६३१६ प्रतिशत नगद लाभांश वितरण गर्ने प्रस्ताव पारित गरेको छ ।
सभाले समीक्षा आर्थिक बर्ष २०८०/०८१ को सञ्चालक समितिको बार्षिक प्रतिवेदन, लेखापरीक्षकको प्रतिवेदन, वासलात, नाफा–नोक्सान हिसाब तथा नगद प्रवाह विवरण र सोही अवधिको वित्तीय विवरणसँग सम्बन्धि टिप्पणीहरूसमेत पारित गरेको छ ।
आर्थिक वर्ष २०८०/०८१ मा यस होटलको कूल बिक्री रु. १२१.६७ करोड रुपैयाँ रहेको र कूल सञ्चालन खर्च ९६.७० करोड रहेको कम्पनीले जनाएको छ ।
सो अवधिमा २४.९७ करोड सञ्चालन नाफा गरेको कम्पनीले सम्पूर्ण खर्चहरू कट्टा गरि खुद नाफा १२.४० करोड भएको छ । जबकि कम्पनीले अघिल्लो आर्थिक वर्ष २०७९/८० मा नाफा १८.४६ करोड रुपैयाँ मात्रै नाफा गरेको थियो ।
अघिल्लो बर्षको नाफामा असाधारण आम्दानी समेत रहेकोले सो लाई हटाई तुलना गर्ने हो भने होटलको बिक्री र नाफामा बृद्धि भएको देखिन्छ । त्यस्तै, कम्पनीले निर्माण गरेको नयाँ भवन यसै बर्ष पूरा भई सञ्चालनमा आउने बताइएको छ । नयाँ भवन सञ्चालनमा आएसँगै आम्दानी बढ्ने कम्पनीले जनाएको छ ।
यसैगरी, पुरानो भवनको तेस्रो, चौथो र पाँचौँ तल्ला पुनः निर्माण गरि आधुनिक बनाउने कार्य सुरु भएको कम्पनीले जनाएको छ । आगामी दिनमा पर्यटन आगमन बृद्धि हुने प्रक्षेपण गरिएको हुनाले उत्साहित भएको कम्पनीले जनाएको छ ।
The post ओरियण्टल होटल्स लिमिटेडको २७औँ साधारणसभा सम्पन्न; ५% बोनस शेयर प्रदान first appeared on Khabar Breaking.
