काठमाडौं ७ फागुन । नेकपा एकीकृत समाजवादी पार्टीको स्थायी समिति बैठक बस्दै छ। पार्टी अध्यक्ष माधवकुमार नेपालले यथास्थितिमा एमसीसी अनुमोदन हुन नसक्ने बताउँदै आएका छन्।
बिहीबार बालुवाटारमा बसेको सत्ता गठबन्धन दलको बैठकमा एकीकृत समाजवादीका अध्यक्ष नेपालले एमसीसीबारे स्थायी समितिको बैठक बसेर आधिकारिक धारणा बनाउने भन्दै प्रधानमन्त्री शेरबहादुर देउवासँग समय मागेका थिए। व्याक्तिगत रुपमा अध्यक्ष नेपाल एमसीसीबारे नकरात्मक नरहेपनि उनको पार्टीका अन्य नेताहरु यथास्थितीमा अनुमोदन गर्न नहुने पक्षमा छन्।
सो पार्टीका सम्मानित नेता झलनाथ खनाल एमसीसी कुनैपनि हालतमा अनुमोदन गर्न नहुने पक्षमा छन्। खनालको कारणपनि हध्यक्ष नेपाल दवावमा छन्। प्रधानमन्त्री देउवाले नेकपा माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष नेपाललाई एमसीसीबारे छिटो निर्णय गर्न आग्रह गरेका छन्।
दाहाल र नेपालले नमाने नेकपा एमालेसँग सहकार्य गरी संसदबाट एमसीसी अनुमोदन गर्ने तयारी प्रधानमन्त्री देउवाले गरेका छन्। प्रधानमन्त्री देउवा र एमाले अध्यक्ष ओलीबीच बिहीबार बेलुकी एमसीसी अनुमोदन गर्नेबारे छलफल भएको थियो। प्रधानमन्त्री देउवा ओलीलाई भेटन पत्नी आरजुलाई लिएर बालकोट गएका थिए। स्थायी समिति बैठक ११ बजेलाई तय भएको छ।
