१९ असोज, काठमाडौं । आठ किलो सुनसहित हेटौंडाबाट दुईजना भारतीय नागरिक पक्राउ परेका छन् । हेटौंडा उपमहानगरपालिका–१५ रातोमाटे चेकपोष्टस्थित पथलैयाबाट हेटौंडातर्फ आउँदै गरेको वाग्मती प्रदेश ०२–०४७ प ७५०३ नम्बरको स्कुटर जाँच गर्दा उक्त सुन फेला परेको जिल्ला प्रहरी कार्यालय मकवानपुरका डीएसपी श्याम आर्यालले जानकारी दिनु भयो ।
पक्राउ पर्नेमा भारतीय नागरिक २५ वर्षका अभिषेक अजिनाथ कुटी र २७ वर्षका राहुल भिट्टीहाल हुन । आज बिहान ३ बजे विशेष सूचनाको आधारमा प्रहरीले उक्त स्कुटर जाँच गरेको थियो ।
बरामद सुनको मूल्य ११ करोड ४३ लाख ५७ हजार रूपैयाँ बराबरको रहेको प्रहरीले जनाएको छ । उनीहरूलाई थप अनुसन्धान तथा कारबाहीका लागि राजस्व अनुसन्धान कार्यालय पथलैया पठाउने तयारी भइरहेको डीएसपी अर्यालले जानकारी दिनु भयो ।
The post आठ किलो सुनसहित दुई भारतीय नागरिक पक्राउ first appeared on Khabar Breaking.
