११ साउन , काठमाडौं । नेपाल राष्ट्र बैंकले चालु आर्थिक वर्ष २०८१/८२ को लागि मौद्रिक नीति सार्वजनिक गर्दै नीतिगत दर र बैंक दर घटाएकाे छ ।
नीतिगत दरलाई ५.५ प्रतिशत विन्दुबाट ५ प्रतिशत कायम गरेको छ । त्यस्तै , बैंकदर ७ प्रतिशतबाट ६.५ प्रतिशत कायम गरिएको छ ।
राष्ट्र बैंकले आर्थिक वर्ष २०८१/८२ मा मुद्रास्फिति ५.५ प्रतिशत सीमाभित्र रहने प्रक्षेपण गरेको छ । ‘आर्थिक वर्ष २०८१/८२ को बजेट वक्तव्यमा मुद्रास्फिति ५.५ प्रतिशतको सीमाभित्र रहने अनुमान गरेको छ,’ मौद्रिक नीति सार्वजनिक गर्दै गभर्नर महाप्रसाद अधिकारीले भने , ‘यसमा केही जोखिम रहे पनि मुद्रास्फितिको कारकहरूलाई नजर राख्दा उक्त सीमाभित्र रहने प्रक्षेपण गरिएको छ ।’
उनले सम्पत्ति व्यवस्थापन कम्पनी सम्बन्धि कानूनकाेे मस्यौदा बनाइ नेपाल सरकारलाई हस्तान्तरण गरिने पनि बताए ।
त्यस्तै ,राष्ट्र बैंकले चालु आर्थिक वर्ष २०८१/८२ को मौद्रिक नीतिमार्फत संस्थागत लगानीकर्ताहरुका लागि बैंक तथा वित्तीय संस्थाहरुले मार्जिन प्रकृतिको सेयर धितोमा प्रवाह गर्ने कर्जाको विद्यमान अधिकतम २० करोडको सीमा खारेज गरेको हो । व्यक्तिगतर्फको १५ करोडको सीमालाई भने यथावत राखेको छ ।
साउनको पहिलो शुक्रबार नै सार्वजनिक गर्ने तयारी रहेको मौद्रिक नीति एक साता ढिलो गरेर शुक्रबार नै केन्द्रीय बैंकले मौद्रिक नीति सार्वजनिक गरेको छ ।
सरकारले ल्याएको बजेट कार्यान्वयनमा सहज पुग्ने र अर्थतन्त्र चलायमान गराउन मौद्रिक नीतिले भूमिका खेल्ने केन्द्रीय बैंकका गभर्नर अधिकारीले बताएका छन् । मौद्रिक नीति विगतको भन्दा केही लचिलो पनि देखिएको छ ।
The post मौद्रिक नीति २०८१/८२ सार्वजनिक; नीतिगत दर र बैंक दर घटाइयो first appeared on Khabar Breaking.
