काठमाडौं पुष ९ । शहरी विकास मन्त्री रामकुमारी झाँक्रीले आफूलाई ढलको बिर्कोले दुस्ख दिएको गुनासो सुनाएकी छन् । सत्तारुढ दलनिकट इन्जिनियरहरूको कार्यक्रममा बोल्दै इन्जिनियरहरुले ढलको बिर्को मिलाउन नसकेको भन्दै आलोचना गरेकी थिइन् ।
मन्त्री झाँक्री सत्तारुढ दलहरू माओवादी, नेकपा एस र जनता समाजवादीनिकट इन्जिनियहरूको संयुक्त उम्मेदवारी घोषणा कार्यक्रममा बोल्दै उनले भनिन्, ‘हाम्रो देशका इन्जिनियरले जसरी फिनिसिङ गर्नुुहुन्छ नि, त्यसरी नै सर्जनले अपरेसन गरे भने के होला ? ’ उनले विगतमा स्कुटरमा यात्रा गर्दाको अनुभव पनि सुनाइन् ।
झाँक्रीले भनिन्, ‘म मन्त्री हुनुअघि दुईपांग्रे स्कुटर चढ्थेँ । कालगतिले मन्त्री बनायो, अहिले गाडी चढिरहेको छु । तर, म स्कुटर चढ्ने मान्छेलाई ढलको बिर्कोले जहिल्यै दुस्ख दियो । म पटकपटक लडेँ । यो देशका इन्जिनियरले ढलको विर्को मिलाउने दिन कहिले आउला ? यो मेरो व्यवसायीक चुनौती हो ।’
