५ कार्तिक ,काठमाडौँ । निजी विद्यालयहरुको संगठन प्याब्सनले आगामी मंसिर १४ र १५ गते अन्तर्राष्ट्रिय शैक्षिक सम्मेलनको आयोजना गर्ने भएको छ। आज काठमाडौँमा पत्रकार सम्मेलन गर्दै प्याब्सनले मङ्सिर १४ र १५ गते अर्थात् नोभेम्बर २९ र ३० मा काठमाडौँको होटल हायत रिजेन्सीमा तेस्रो अन्तर्राष्ट्रिय शैक्षिक सम्मेलन गर्ने जानकारी दिएको हो ।
उक्त सम्मेलनमा शिक्षा क्षेत्रका अग्रणी व्यक्तित्वहरू, विद्यालयका संस्थापक प्रिन्सिपल, शैक्षिक निर्देशक र अग्रणी शिक्षकहरूका लागि लक्षित हुने प्याब्सनका महासचिव आरबी कटवालले बताए । त्यस्तै , सम्मेलनका मुख्य उद्देश्यहरूमा विद्यालयको स्तर उन्नति, कक्षा कोठाको सुधार, शैक्षिक नेतृत्वको विकास, र शिक्षक–विद्यार्थीको शैक्षिक गतिविधिलाई कसरी प्रभावकारी बनाउने भन्ने विषयमा गहन छलफल गरिने उनले बताए ।
यस सम्बन्धि प्याब्सनको विज्ञप्तिमा भनिएको छ,‘ शैक्षिक सम्मेलनमा फिनल्यान्ड र बेलायत जस्ता शिक्षामा अग्रणी देशहरूबाट प्रतिष्ठित वक्ताहरूले आफ्ना अनुभव र सफल शैक्षिक मोडलहरू प्रस्तुत गर्नुहुनेछ । साथै, यो सम्मेलनलाई नेपाल सरकारको शिक्षा मन्त्रालय र ब्रिटिस काउन्सिलद्वारा सहजीकरण हुनेछ, जसले यसलाई अझ प्रभावकारी र परिणाममुखी बनाउनेछ ।’ सम्मेलनमा भुटान, पाकिस्तान, बङ्गलादेश, श्रीलंका, भारत र भियतनामबाट पनि सहभागिताका लागि निश्चित भएको जनाइएको छ ।
विज्ञप्तिमा भनिएको छ,‘दुई दिनसम्म चल्ने यस सम्मेलनमा १२ भन्दा बढी सेसनहरू हुनेछन्, जसमा विविध शैक्षिक विषयका छलफल, नीतिगत बहस, र विद्यालय सुधारका लागि प्रभावकारी उपायहरूको खोजी गरिनेछ । यसका साथै, विद्यालय व्यवस्थापन, शिक्षक प्रशिक्षण, र शैक्षिक नेतृत्वको सुदृढीकरणमा महत्त्वपूर्ण सुझावहरू प्रस्तुत गरिनेछन् ।’
साथै , अन्तर्राष्ट्रिय स्तरको शिक्षा नेपालमा नै प्रदान गरी नेपालबाट बाहिरिने विद्यार्थी रोक्न र नेपालमा नै विदेशी विद्यार्थी अध्ययन गराई नेपाललाई शैक्षिक गन्तव्य बनाउनु सम्मेलनको उद्देश्य रहेको प्याब्सनले जनाएको छ।
The post मंसिरमा अन्तर्राष्ट्रिय शैक्षिक सम्मेलन गर्दै प्याब्सन first appeared on Khabar Breaking.