🎄 Holiday Season Special
हामी चुनावी प्रतिस्पर्धाका लागि पूर्ण तयारीमा छौंः लुइटेल
१८ मंसिर, काठमाडौं । प्रजातान्त्रिक पार्टी नेपाल देशभरका जनतामाझ आफ्नो संरचनात्मक क्षमता, संगठनगत तयारी र जनसम्पर्क विस्तारलाई अझ सबल बनाउँदै व्यापक देशव्यापी दौडाहामा जुटेको छ। पार्टीले ‘जनताको घर–आँगनमा, जनताको मुहारमा परिवर्तन’ भन्ने मूल नारासहित स्थानीय बस्ती, टोल, गाउँ, नगर हुँदै जनतासँग प्रत्यक्ष संवाद र सुझाव सङ्कलन अभियानलाई तीव्र बनाएको जनाएको छ।
पार्टी अध्यक्ष डा. तारानाथ लुइटेलका अनुसार प्रजातान्त्रिक पार्टी नेपालको मुख्य लक्ष्य आगामी निर्वाचनलाई जनतासँगको प्रत्यक्ष सम्बन्ध, पारदर्शी नीति र जनमुखी योजनाको आधारमा प्रतिस्पर्धात्मक बनाउनुपर्छ भन्ने हो। ‘‘हाम्रो पार्टीको नीति स्पष्ट छ—जनताको दुःखसुख नजिकबाट बुझ्ने, वास्तविक समस्या सुन्ने र समाधानका लागि कार्ययोजना बनाउँदै जनआकाङ्क्षाको प्रतिनिधित्व गर्ने,’’ अध्यक्ष लुइटेलले भने।
उनका अनुसार पार्टीले देशका सबै प्रदेश र निर्वाचन क्षेत्रमा योग्य, सक्षम र जनतासँग प्रत्यक्ष काम गर्ने नेतृत्वलाई अघि सार्दै आगामी निर्वाचनमा देशभरिबाट उम्मेदवार उठाउने तयारी पूरा गरिरहेको छ। संगठनका तल्लो तहदेखि केन्द्रसम्मका टोली अहिले विभिन्न जिल्लामा जनसम्पर्क अभियान, भौतिक संरचना समीक्षा, नीति–कार्यक्रमका छलफल र स्थानीय नेतृत्वसँग एकीकृत योजनामा जुटिरहेका छन्।
‘‘हामी चुनावी प्रतिस्पर्धाका लागि पूर्ण तयारीमा छौं। जनताले चाहे परिवर्तन चाहेका छन्, पारदर्शिता चाहेका छन्, अब त्यो नेतृत्व हाम्रो पार्टी दिन सक्षम छ,’’ अध्यक्ष लुइटेलले बताए। उनका अनुसार प्रजातान्त्रिक पार्टी नेपालले वैकल्पिक नेतृत्व, स्वच्छ राजनीतिक संस्कार र जवाबदेही शासन व्यवस्थाको खाका जनतासमक्ष पस्कँदै राजनीतिक विकल्पको नयाँ अन्तर्कथा निर्माण गर्ने लक्ष्य लिएको छ।
पार्टीका अनुसार हाल सञ्चालन भइरहेको देशव्यापी दौडाहाले विभिन्न समुदाय, किसान, युवा, व्यवसायी र बौद्धिक वर्गबीच उल्लेख्य जनसमर्थन पाएको छ। धेरै स्थानीय क्षेत्रमा जनताको स्वागत, सराहना र सुझावले अभियानलाई अझ ऊर्जा प्रदान गरेको पार्टी नेतृत्वको दाबी छ।
पार्टीले आगामी केही साताभित्र देशका प्रमुख शहर र ग्रामीण भूभागमा ठूला जनसभा, खुला अन्तरक्रिया कार्यक्रम र युवा अभियान सञ्चालन गर्ने तयारी गरेको छ। ‘‘देशले नयाँ सोच, नयाँ शैली र जवाफदेही नेतृत्व खोजिरहेको छ। प्रजातान्त्रिक पार्टी नेपाल यही आवश्यकता पूरा गर्न अघि बढेको हो,’’ अध्यक्ष लुइटेलले जोड दिए।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
