🎄 Holiday Season Special
सहमतिको आधारमा एनआरएनएको अध्यक्षमा हेमराज शर्मा चयन, सबै कार्यसमितिमा सहमति
काठमाडौँ । गैरआवासीय नेपाली संघ (एनआरएनए) को अध्यक्ष पदमा सहमतिको आधारमा हेमराज शर्मा चयन भएका छन् । लामो समयदेखि जारी विवाद र प्रतिस्पर्धाबीच अन्ततः सहमति जुटेसँगै संघको नेतृत्व चयन प्रक्रिया टुंगिएको हो । अध्यक्ष पदका प्रत्याशी रविन बज्राचार्यले आइतबार साँझ पत्रकार सम्मेलन गरी आफूले उम्मेदवारी फिर्ता लिँदै शर्मालाई समर्थन गर्ने घोषणा गरेका थिए ।
पत्रकार सम्मेलनमा बोल्दै बज्राचार्यले संघको एकता, संस्थागत स्थायित्व र आगामी कार्यकाललाई प्रभावकारी बनाउन आफूले सहमतिको बाटो रोजेको बताए । उनले निर्वाचनमा जाँदा संघलाई अनावश्यक आर्थिक भार पर्ने र नेतृत्वबीच अनावश्यक प्रतिस्पर्धा बढ्ने भएकाले सहमतिमार्फत नेतृत्व चयन गर्नु नै उपयुक्त भएको धारणा राखे । उनले यो महाधिवेशनलाई “एकताको महाधिवेशन” बनाउने उद्देश्यले आफू अध्यक्ष पदको दाबीबाट पछि हटेको स्पष्ट पारे ।
सहमति अनुसार बज्राचार्य स्वयं उपाध्यक्ष पदमा रहने सहमति भएको छ । त्यसैगरी यसअघि नै आफ्नो उम्मेदवारी फिर्ता लिएका रविन शेरचनलाई पनि उपाध्यक्ष पदमा समावेश गर्ने सहमति भएको बताइएको छ । यसरी अध्यक्षसहित शीर्ष नेतृत्वमा सहमति कायम गरिँदा संघभित्र देखिएको गुटगत प्रतिस्पर्धा कम हुने विश्वास गरिएको छ ।
निर्वाचन आयुक्त टीबी कार्कीका अनुसार अध्यक्षसहित सबै पदाधिकारी र कार्यसमितिमा सहमति जुटिसकेको छ । उनले बाँकी पदहरूमा चयन भएका पदाधिकारी र सदस्यहरूको नामावली सोमबार औपचारिक रूपमा सार्वजनिक गरिने जानकारी दिए । उनका अनुसार महाधिवेशनमा सहभागी प्रतिनिधिहरूबीच लामो छलफल र परामर्शपछि साझा समझदारी बनेको हो ।
एनआरएनएको १२औँ महाधिवेशन फागुन ३० गतेदेखि काठमाडौंमा सुरु भएको थियो । विश्वका विभिन्न मुलुकबाट आएका गैरआवासीय नेपाली प्रतिनिधिहरूको सहभागितामा जारी महाधिवेशनमा संघको भावी दिशा, विदेशमा रहेका नेपालीहरूको अधिकार, लगानी प्रवर्द्धन तथा मातृभूमिसँगको सम्बन्धलाई अझ मजबुत बनाउने विषयमा व्यापक छलफल भएको थियो ।
पछिल्ला वर्षहरूमा संघभित्र नेतृत्व चयनलाई लिएर विवाद र विभाजनको अवस्था सिर्जना भएको थियो । कतिपय अवस्थामा समानान्तर गतिविधिसमेत देखिएको थियो । यस्तो अवस्थामा सहमतिमार्फत नयाँ नेतृत्व चयन हुनु संघभित्र एकताको सन्देश दिने महत्वपूर्ण कदमका रूपमा हेरिएको छ ।
संघका अग्रजहरूले पनि सहमतिमार्फत नेतृत्व चयन भएकोमा खुशी व्यक्त गरेका छन् । उनीहरूका अनुसार विदेशमा रहेका नेपालीहरूको साझा संस्था भएकाले प्रतिस्पर्धाभन्दा सहकार्य र एकता नै संघको शक्ति हो । नयाँ नेतृत्वले संगठनलाई पुनः एकताबद्ध बनाउँदै विश्वभर रहेका नेपाली समुदायलाई एउटै सूत्रमा बाँध्ने अपेक्षा गरिएको छ ।
नवनिर्वाचित अध्यक्ष हेमराज शर्माले पनि सहमतिमार्फत आफूलाई नेतृत्वको जिम्मेवारी दिएकोमा सम्पूर्ण प्रतिनिधिहरूप्रति आभार व्यक्त गरेका छन् । उनले संघलाई विवादमुक्त बनाउँदै संस्थागत सुधार, प्रवासी नेपालीहरूको हित र नेपालमा लगानी विस्तारका क्षेत्रमा सक्रिय रूपमा काम गर्ने प्रतिबद्धता जनाएका छन् ।
महाधिवेशनबाट चयन हुने नयाँ कार्यसमितिले आगामी कार्यकालमा गैरआवासीय नेपालीहरूको हकहित संरक्षण, नेपालसँगको आर्थिक तथा सामाजिक सम्बन्ध सुदृढ बनाउने, वैदेशिक रोजगारी र लगानीका अवसर विस्तार गर्ने लगायतका विषयलाई प्राथमिकतामा राख्ने अपेक्षा गरिएको छ ।
यसरी लामो समयदेखि प्रतीक्षित नेतृत्व चयन प्रक्रिया सहमतिमार्फत टुंगिँदा एनआरएनएको १२औँ महाधिवेशनलाई संस्थागत एकताको नयाँ अध्यायका रूपमा पनि हेरिएको छ ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
