🎄 Holiday Season Special
घृणा, लोकप्रियता र उत्तेजनाबाट देशलाई जोगाउन विवेकपूर्ण राजनीति आवश्यक : अध्यक्ष ढकाल
काठमाडौं । पेशागत महासंघ नेपालका अध्यक्ष पून्य प्रसाद ढकालले घृणा, आवेग र सामाजिक सञ्जालको हल्लाका भरमा बढ्दै गएको राजनीति दीर्घकालमा देशका लागि घातक हुन सक्ने चेतावनी दिएका छन्। उनले समयमै सचेत नहुने हो भने लोकप्रियता र उत्तेजनाबाट निर्देशित राजनीति मुलुकको भविष्यका लागि खतरनाक बन्ने उल्लेख गरे।
अध्यक्ष ढकालले पुराना राजनीतिक दलहरूले विगतमा अपेक्षित काम गर्न नसक्दा जनतामा निराशा बढ्नु स्वाभाविक भएको बताए। तर निराशाको विकल्प विवेकहीन र दिशाहीन राजनीति बन्नु नहुने उनको जोड थियो। “निराशा हुनु स्वाभाविक हो, तर त्यसको समाधान आवेगमा आधारित विकल्प होइन,” उनले भने।
उनका अनुसार पछिल्लो समय कुनै स्पष्ट विचार, नीति, दीर्घकालीन लक्ष्य र सिद्धान्त नबोकेका दलहरू रातारात उदाउने प्रवृत्ति देखिएको छ। यस्ता शक्तिहरू न इतिहास बोकेका छन्, न त्याग र बलिदानको पृष्ठभूमि, न त कुनै सुदृढ वैचारिक जग नै। केवल आक्रोश, असन्तोष र सामाजिक सञ्जालमा फैलिने हल्लाका आधारमा राजनीति गर्न खोज्नु गम्भीर चिन्ताको विषय भएको उनले बताए।
अध्यक्ष ढकालले जनतालाई आवेगभन्दा विवेक, लोकप्रियताभन्दा नीति र उत्तेजनाभन्दा जिम्मेवार विकल्प रोज्न आग्रह गर्दै लोकतन्त्रलाई सुदृढ बनाउन दीर्घकालीन सोच, स्पष्ट कार्यक्रम र उत्तरदायी नेतृत्व अनिवार्य रहेको धारणा राखे। “देश जोगाउने हो भने समय छँदै सोच्नुपर्छ,” उनले स्पष्ट पारे।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
