🎄 Holiday Season Special
प्रजातान्त्रीक पार्टी नेपालले ‘रथ’ चिन्ह लिएर २०८२ को निर्वाचनमा १६५ क्षेत्रमा उम्मेदवारी दिने
काठमाडौं । प्रजातान्त्रीक पार्टी नेपालले आगामी २०८२ सालको प्रतिनिधिसभा निर्वाचनमा चुनाव चिन्ह ‘रथ’ लिएर देशभरका १६५ वटै निर्वाचन क्षेत्रमा उम्मेदवारी दिने घोषणा गरेको छ । पार्टीले ‘रथ’ चिन्हलाई वैदिक सनातन परम्परा र सांस्कृतिक पहिचानसँग जोडिएको प्रतीकका रूपमा व्याख्या गर्दै यसले जनताको भावनालाई प्रतिनिधित्व गर्ने विश्वास व्यक्त गरेको छ ।
पार्टीका अध्यक्ष तारानाथ लुईटेलले ‘रथ’ धार्मिक तथा सांस्कृतिक दृष्टिले महत्वपूर्ण चिन्ह भएको उल्लेख गर्दै वैदिक सनातन हिन्दु अधिराज्य नेपाल र राजसंस्थाप्रति आस्था राख्ने नागरिकबाट व्यापक समर्थन प्राप्त हुने विश्वास व्यक्त गर्नुभयो । उहाँले मुलुकको पहिचान, परम्परा र मूल्य–मान्यताको संरक्षण गर्दै अघि बढ्ने राजनीतिक धारणा पार्टीको मूल एजेन्डा रहेको बताउनुभयो ।
अध्यक्ष लुईटेलका अनुसार प्रजातान्त्रीक पार्टी नेपालले आगामी निर्वाचनमार्फत वैदिक सनातन सभ्यता, राष्ट्रिय स्वाधीनता र संस्थागत स्थायित्वको विषयलाई जनतामाझ लैजाने लक्ष्य राखेको छ । पार्टीले चुनावी अभियानका क्रममा संगठन विस्तार, जनसम्पर्क र वैचारिक बहसलाई प्राथमिकतामा राख्ने जनाएको छ । पार्टी नेतृत्वले लोकतान्त्रिक प्रक्रियामार्फत आफ्ना विचार प्रस्तुत गर्दै जनताको मतमार्फत परिवर्तनको मार्ग रोज्ने प्रतिबद्धता व्यक्त गरेको छ ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
