🎄 Holiday Season Special
प्याब्सनको ३५ औँ स्थापना दिवस भव्यरुपमा सम्पन्न
२४ पुष, काठमाडौं । निजी तथा आवासीय विद्यालय अर्गनाइजेसन नेपाल (प्याब्सन) को ३५ औँ स्थापना दिवस काठमाडौँ जिल्ला प्याब्सनको आयोजनामा राजधानीमा भव्य रूपमा मनाइएको छ। राष्ट्रिय प्रज्ञा प्रतिष्ठान, कमलादीमा सम्पन्न कार्यक्रममा निजी शिक्षा क्षेत्रको भूमिका, योगदान र आगामी यात्राबारे गहिरो विमर्श गरिएको थियो।
कार्यक्रममा काठमाडौँ जिल्लाका निजी तथा आवासीय विद्यालयका सञ्चालक, शिक्षक, विद्यार्थी, अभिभावक, शैक्षिक अभियन्ता तथा शिक्षा क्षेत्रसँग सरोकार राख्ने व्यक्तिहरूको उल्लेखनीय सहभागिता रहेको थियो। विभिन्न राजनीतिक दलका नेताहरूको उपस्थितिले शिक्षा विषयलाई साझा राष्ट्रिय चासोका रूपमा अघि बढाउनुपर्ने सन्देश दिएको सहभागीहरूले बताएका छन्।
कार्यक्रमलाई सम्बोधन गर्दै काठमाडौँ जिल्ला प्याब्सनका अध्यक्ष नवराज भट्टले ३५ वर्षको यात्रामा प्याब्सनले निजी विद्यालयहरूलाई एकीकृत गर्दै गुणस्तरीय शिक्षाको अभियान अघि बढाएको उल्लेख गरे। निजी विद्यालयहरू नाफामुखी मात्र नभई राष्ट्र निर्माणका साझेदार भएको स्पष्ट पार्दै उनले शिक्षा क्षेत्रमा निजी र सरकारी क्षेत्रबीच सहकार्य अपरिहार्य भएको धारणा राखे। शिक्षकको पेशागत विकास, विद्यार्थीमैत्री वातावरण र अभिभावकसँगको सम्बन्ध सुदृढ गर्नुपर्नेमा उनले जोड दिए।
विशेष अतिथि नेपाली कांग्रेसका शिक्षा विभाग प्रमुख नैन सिंह महरले शिक्षा क्षेत्रलाई राजनीतिक स्वार्थभन्दा माथि राखेर राष्ट्रिय प्राथमिकतामा राख्नुपर्ने बताए। निजी विद्यालयहरूको योगदानलाई नकारात्मक दृष्टिले हेर्ने प्रवृत्तिप्रति आपत्ति जनाउँदै उनले गुणस्तरीय शिक्षा प्रदान गर्ने सबै प्रयासलाई राज्यले संरक्षण र प्रोत्साहन गर्नुपर्ने बताए। शिक्षा नीतिमा स्थायित्व, पाठ्यक्रम सुधार र शिक्षकको सम्मान आजको मुख्य आवश्यकता भएको उनको भनाइ थियो।
प्याब्सनका केन्द्रीय उपाध्यक्ष रबिन्स शर्माले पनि कार्यक्रममा सहभागिता जनाउँदै केन्द्रीय नेतृत्वको तर्फबाट शुभकामना व्यक्त गरे। उनले शिक्षालाई परीक्षा केन्द्रित सीमाभन्दा बाहिर ल्याएर सीप, संस्कार र संस्कृतिसँग जोड्नुपर्नेमा जोड दिए। विद्यालयले विद्यार्थीलाई केवल प्रतिस्पर्धी होइन, जिम्मेवार, नैतिक र सचेत नागरिक बनाउने दायित्व वहन गर्नुपर्ने उनले बताए।
उनले आजको आवश्यकता गुणस्तरीय र सीपमूलक शिक्षा भएको बताए । शर्माले देशमा बढ्दै गएको शैक्षिक बेरोजगारीको समस्या समाधानका लागि नेपाल सरकार गम्भीर हुनुपर्नेमा जोड दिए।
उपाध्यक्ष शर्माले नेपालको शैक्षिक विकासमा निजी तथा आवासीय विद्यालयहरूको योगदान अतुलनीय रहेको उल्लेख गर्दै गुणस्तरीय शिक्षाको प्रवर्द्धनमा प्याब्सन निरन्तर लागिरहेको बताए। शिक्षा केवल प्रमाणपत्रमा सीमित नभई व्यवहारिक सीप र रोजगारीसँग जोडिनुपर्ने उनको भनाइ थियो।
त्यसैगरी प्याब्सनका वरिष्ठ सल्लाहकार डिके ढुंगानाले संस्थाको स्थापना कालदेखि हालसम्मको यात्रालाई स्मरण गर्दै शिक्षा क्षेत्रमा देखिएका परिवर्तन, चुनौती र सम्भावनाबारे धारणा राखे। संस्थागत एकता, पारदर्शिता र दीर्घकालीन सोचबिना दिगो शैक्षिक विकास सम्भव नहुने उनको निष्कर्ष थियो।
कार्यक्रमको अर्को आकर्षण विद्यार्थीहरूले प्रस्तुत गरेका सांस्कृतिक कार्यक्रम रहेका थिए। विभिन्न विद्यालयका विद्यार्थीहरूले नेपाली मौलिकता, जातीय विविधता र सांस्कृतिक पहिचान झल्किने नृत्य तथा प्रस्तुतिहरू देखाएर कार्यक्रमलाई थप जीवन्त बनाएका थिए।
प्याब्सनको ३५ औँ स्थापना दिवसको अवसरमा आयोजित कार्यक्रम शिक्षा, संस्कृति र सहकार्यको सन्देशसहित सफलतापूर्वक सम्पन्न भएको काठमाडौँ जिल्ला प्याब्सनले जनाएको छ। निजी शिक्षा क्षेत्र र राज्यबीच सहकार्य अझ सुदृढ हुनुपर्ने निष्कर्षसहित कार्यक्रम सम्पन्न भएको सहभागीहरूको प्रतिक्रिया रहेको छ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
