🎄 Holiday Season Special
वरिष्ठ पत्रकार बिन्दुकान्त घिमिरेले उठाए वैचारिक प्रश्न
काठमाडौं । परिवर्तनका लागि गान्धी दर्शन उचित कि लेनिन दर्शन भन्ने प्रश्न नेपालमा मात्रै होइन, विश्व राजनीतिमै दीर्घकालदेखि विवादित रहँदै आएको विषय हो । यही वैचारिक द्वन्द्व अहिले नेपाली कांग्रेसभित्र देखिएको नेतृत्व परिवर्तनको बहसमा पनि प्रतिविम्बित भएको छ ।
वरिष्ठ पत्रकार बिन्दुकान्त घिमिरेले सामाजिक सञ्जाल फेसबुकमा गरेको एक टिप्पणीमा कांग्रेसभित्र भइरहेको नेतृत्वगत गतिविधिलाई वैचारिक आधारमा प्रश्न उठाएका छन् । उनका अनुसार यदि अहिलेको नेतृत्व परिवर्तन गान्धी दर्शनमा आधारित हुन्थ्यो भने त्यसको औचित्य पुष्टि गर्न लेनिनवादी धारका बुद्धिजीवीहरूलाई ‘खोजी–खोजी’ बहसमा उतार्नु आवश्यक नै पर्ने थिएन ।
घिमिरेले भनेका छन्, बोल्सेभिक क्रान्तिलाई मार्गदर्शन मान्नेहरूका दृष्टिमा नेपाली कांग्रेसमा हाल जे भइरहेको छ, त्यो स्वाभाविक र जायज देखिन सक्छ । तर कांग्रेसको ऐतिहासिक पृष्ठभूमि र आत्मा गान्धीवादी अहिंसात्मक आन्दोलनसँग जोडिएको सन्दर्भमा गान्धी दर्शनलाई आधार मान्ने बुद्धिजीवीहरूको दृष्टिकोण पनि समान रूपमा सुन्नुपर्ने आवश्यकता रहेको उनले औंल्याएका छन् ।
उनले कांग्रेस महामन्त्री गगन थापाले आफ्नो राजनीतिक कदमको औचित्य पुष्टि गर्न खगेन्द्र संग्रौला लगायत लेनिनवादी धारका बुद्धिजीवीहरूलाई अघि सारेको प्रसंग उल्लेख गर्दै प्रश्न गरेका छन्—त्यसरी नै पुरुषोत्तम दाहाल जस्ता गान्धीवादी चिन्तकहरूलाई बहसमा उतार्ने हिम्मत किन देखाइँदैन ?
घिमिरेको टिप्पणीले कांग्रेसभित्रको नेतृत्व बहस केवल व्यक्ति वा समूहको प्रतिस्पर्धा मात्र नभई, पार्टीको वैचारिक दिशाबारे गहिरो प्रश्न उठाइरहेको संकेत गर्छ । गान्धीको अहिंसात्मक, नैतिक राजनीतिलाई आत्मसात गर्ने कि लेनिनको क्रान्तिकारी, संघर्षमुखी दर्शनलाई सन्दर्भ बनाउने भन्ने बहसले कांग्रेसको भविष्य कुन बाटोमा जाने भन्ने प्रश्नलाई अझ तीव्र बनाएको देखिन्छ ।
सामाजिक सञ्जालमा आएको यो टिप्पणीले कांग्रेसभित्र मात्र होइन, समग्र लोकतान्त्रिक राजनीतिमा पनि विचार, दर्शन र नेतृत्वबीचको सम्बन्धबारे नयाँ बहसलाई जन्म दिएको छ ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
