🎄 Holiday Season Special
छ्याङ्दी हाइड्रोपावर लिमिटेडको १२औँ वार्षिक साधारणसभा काठमाडौँमा सम्पन्न
काठमाडौं । छ्याङ्दी हाइड्रोपावर लिमिटेडको १२औँ वार्षिक साधारणसभा काठमाडौँमा सम्पन्न भएको छ। सभाले आर्थिक वर्ष २०८१/०८२ को वार्षिक प्रतिवेदन र लेखापरीक्षित वित्तीय विवरणलाई सर्वसम्मत रूपमा पारित गरेको छ। यसका साथै, आगामी आर्थिक वर्ष २०८२/०८३ का लागि लेखापरीक्षकको नियुक्ति, निजको पारिश्रमिक निर्धारण र कम्पनीको प्रबन्धपत्र तथा नियमावलीमा आवश्यक संशोधनका लागि सञ्चालक समितिलाई अख्तियारी दिने निर्णयहरू समेत सभाबाट अनुमोदन भएका छन्।
कम्पनीले लमजुङ जिल्लामा सञ्चालित ४ मेगावाट र २ मेगावाट क्षमताका छ्याङ्दी खोला साना जलविद्युत् आयोजनाहरूबाट नियमित उत्पादन गरी नेपाल विद्युत प्राधिकरणलाई आपूर्ति गरिरहेको जानकारी दिएको छ। समीक्षा अवधिमा विद्युत् बिक्रीबाट हुने आम्दानीमा वृद्धि देखिए तापनि प्राधिकरणको खरिद दर न्यून भएका कारण मुनाफा भने अपेक्षा गरे अनुरूप बढ्न नसकेको प्रतिवेदनमा उल्लेख छ। प्रतिकूल दरका बाबजुद कम्पनीले आफ्नो उत्पादन क्षमतालाई पूर्ण सदुपयोग गर्न सफल देखिएको छ।
आगामी रणनीतिका सम्बन्धमा कम्पनीले नयाँ जलविद्युत् आयोजनाहरूमा लगानी विस्तार गर्ने महत्त्वाकांक्षी नीति सार्वजनिक गरेको छ। आफ्ना विद्यमान आयोजनाहरूलाई थप प्रभावकारी, दिगो र आर्थिक रूपमा सबल बनाउँदै लैजाने प्रतिबद्धता जनाउँदै कम्पनीले ऊर्जा क्षेत्रमा आफ्नो उपस्थिति बलियो बनाउने योजना अघि सारेको छ। यस लगानी विस्तारको रणनीतिले भविष्यमा सेयरधनीहरूलाई थप प्रतिफल दिने विश्वास कम्पनीले लिएको छ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
