🎄 Holiday Season Special
ओलीले चाले झापामा यस्तो कदम
काठमाडौँ । नेकपा एमालेका अध्यक्ष तथा झापा क्षेत्र नम्बर ५ का प्रतिनिधिसभा सदस्य उम्मेदवार केपी शर्मा ओली ले यसपटक आफ्नो परम्परागत चुनावी शैलीमा उल्लेख्य परिवर्तन गरेका छन् । विगतका निर्वाचनमा सीमित सभा र औपचारिक भेटघाटमार्फत चुनाव जित्दै आएका ओली अहिले भने मतदाताको घर–घरमै पुगेर प्रत्यक्ष संवाद गर्ने रणनीतिमा उत्रिएका छन् । जसरी पनि जनताको मन जितेर निर्वाचन जित्ने लक्ष्यसहित ओलीले झापा–५ लाई केन्द्रमा राख्दै सम्पूर्ण शक्ति परिचालन गरेका छन् ।
पार्टी स्रोतका अनुसार झापा–५ लाई आफ्नो किल्लाका रूपमा हेरेका ओलीले यसपटक मतदातासँगको दूरी घटाउने र उनीहरूको दैनिक समस्या, गुनासा तथा अपेक्षा प्रत्यक्ष सुन्ने अभियान थालेका हुन् । बद्लिएको रणनीतिअनुसार ओली आफैँ सम्भव भएसम्म टोल–टोल र घर–घर पुग्नेछन् । आफू पुग्न नसकेका स्थानमा निकटका कार्यकर्ता खटाएर मतदाताका गुनासा टिपोट गर्न लगाइएको छ, जसलाई पछि नीति तथा कार्यक्रमसँग जोडेर सम्बोधन गर्ने तयारी गरिएको छ ।
झापा–५ मा यसपटकको मुख्य प्रतिस्पर्धा ओली र राष्ट्रिय स्वतन्त्र पार्टीका वरिष्ठ नेता बालेन शाह बीच हुने आकलन गरिएको छ । बालेनको बढ्दो लोकप्रियता र युवामाझको आकर्षणले झापामा रोचक प्रतिस्पर्धा सिर्जना गरिरहेको बेला ओलीले पनि आक्रामक घरदैलो अभियानमार्फत आफ्नो पकड बलियो बनाउन खोजिरहेका छन् । बालेन दुई चरणमा झापा पुगेर मतदाता भेटघाट र त्यसपछि अन्य क्षेत्रमा ‘रोड सो’मा सक्रिय भइरहेका छन् भने ओली भने प्रत्यक्ष घरदैलो अभियानमै केन्द्रित देखिएका छन् ।
माघ ६ मा उम्मेदवारी दर्ता गरेयता ओली अधिकांश समय झापामै बिताइरहेका छन् । उम्मेदवारी दर्तापछि केही दिन काठमाडौँ बसेर पुनः माघ अन्तिम साता झापा पुगेका ओलीले करिब एक साताको अवधिमा झापा–५ का विभिन्न गाउँ र टोलमा पुगेर मत माग्नुका साथै स्थानीयका समस्या सुने । त्यसपछि केही दिन काठमाडौँ बसेका ओली आइतबार फेरि झापा फर्किसकेका छन् ।
गत माघ २३ गते झापा आएर सात दिनमा करिब ८० वटा गाउँ घुमेका ओलीले पछिल्लो पटक झापा ओर्लनासाथ शिक्षक भेला, धिमाल जातिको भेला तथा मुस्लिम समुदायसँगको अन्तरक्रियामा सहभागिता जनाएका थिए । त्यसपछि दमक–२ स्थित अस्थायी निवासमा भौगोलिक क्षेत्रका कार्यकर्ता र सर्वसाधारणसँग प्रत्यक्ष भेटघाट गर्ने कार्यक्रम तय गरिएको नेकपा एमाले झापाका सचिव तुलसी कार्कीले जानकारी दिए ।
एमाले झापा क्षेत्र नम्बर ५ का चुनावी कमाण्डर तथा केन्द्रीय सदस्य देवेन्द्र दाहालका अनुसार ओली फागुन ६ गतेसम्म झापामै रहनेछन् । यस अवधिमा दमक क्षेत्रका विभिन्न गाउँ र टोलमा दैनिक कम्तीमा ६–७ स्थानमा पुग्ने गरी घरदैलो कार्यक्रमको कार्यतालिका बनाइएको छ । पार्टीका केन्द्रीय, प्रदेश, जिल्ला र क्षेत्रीय तहका पदाधिकारी तथा जनवर्गीय सङ्गठनका प्रतिनिधिहरू समेत घरदैलोमा परिचालित छन् ।
दाहालका अनुसार ओलीको अनुपस्थितिमा पनि घरदैलो अभियान रोकिने छैन । स्थानीय टोल र प्रत्येक मतदाताका घरमा पुगेर सुझाव सङ्कलन गर्ने, पार्टीसँग प्रत्यक्ष जोड्ने र निर्वाचनमा सक्रिय सहभागिताका लागि प्रेरित गर्ने काम निरन्तर चलिरहेको छ । झापा–५ अन्तर्गतका २९ वटै वडाका सबै टोलमा पुगेर मतदातालाई मतदानमा सहभागी हुन र पार्टी अध्यक्ष ओलीलाई विजयी गराउन आग्रह गरिएको एमालेले जनाएको छ ।
पार्टीका अनुसार जनताबाट आएका सुझावलाई नीतिगत रूपमा समेट्दै स्थानीय आवश्यकताअनुसार भूमिका खेल्ने प्रतिबद्धता गरिएको छ । यसरी आक्रामक घरदैलो र प्रत्यक्ष संवादमा उत्रिएका ओलीको बद्लिएको चुनावी रणनीतिले झापा–५ को चुनावी माहोललाई अझ रोचक बनाएको छ ।
This content is sourced from khabarbreaking.com. All rights reserved. Used under fair use or with permission. Complies with copyright laws in USA, Europe, Japan, Australia, South Asia, and Nepal.
