सुनचाँदी तथा आभुषणमा २% बिलासिता कर र १३% मूल्य अभिवृद्धि कर असार मसान्तसम्ममा खारेज गर्न व्यवसायीको माग
५ असार , काठमाडौं । सुनचाँदी तथा आभुषण व्यवसायीहरूले सुनचाँदीका गहना तथा आभुषणमा २% बिलासिता कर र १३% मूल्य अभिवृद्धि कर लगाइएकोमा त्यसलाई असार मसान्तसम्ममा खारेज गर्न माग गरेका छन् । व्यवसायीका मागहरू पुरा नभएमा संयुक्त संघर्ष समितिले थप आन्दोलनका कार्यक्रम ल्याउने समेत उनिहरुले चेतावनी दिएका छन् ।
नेपाल सुनचाँदी व्यवसायी महासंघ र नेपाल सुनचाँदी रत्न तथा आभुषण महासंघले बिहीवार पत्रकार सम्मेलन गर्दै नेपाल सरकारले आर्थिक वर्ष २०८२/८३ को बजेटमा उल्लेख भएका अव्यवहारिक करले व्यवसायमा नकारात्मक असर पर्ने भन्दै यस विषयमा व्यवसायीहरूको असार ४ गतेको राष्ट्रिय भेलाले गरेको ‘काठमाडौं घोषणा-पत्र २०८२’ बारे जानकारी दिएका छन् ।
सुनचाँदी व्यवसायीले आम उपभोक्ता समेतको हितलाई ध्यान दिएर सरकारसंग वार्ता र संघर्षका कार्यक्रम अगाडि बढाउने जनाएका छन् । व्यवसायीहरूले सरकारले वृद्धि गरेको करको कारण सुनका गरगहनामा १९ प्रतिशत सम्मको मूल्य बढ्ने र यति ठूलो मूल्य वृद्धिको बोझ आम नेपाली उपभोक्ताले बोक्न नसक्ने बताए ।
त्यसैले बढेको कर फिर्ता गर्नुपर्ने र सुनचाँदी , हीरा तथा वहुमूल्य धातुका गहना सम्बन्धि नीति निर्देशिका यथाशिघ्र लागू गर्नुपर्ने व्यवसायीको माग रहेको छ।
कार्यक्रममा नेपाल सुनचाँदी व्यवसायी महासंघका अध्यक्ष अर्जुन रसाइलीले व्यवसायीका मागहरु पुरा गर्ने आश्वासन प्रधानमन्त्रीले नै दिएका कारण व्यवसायीहरुले घोषणा गरेका आन्दोलनका कार्यक्रम साउन महिनासम्मको लागि स्थगित गरेको बताए। बजेटमा आएको प्रावधानले गर्दा व्यवसायीलाई मात्रै नभएर आम उपभोक्तालाई नै अप्ठ्यारो पर्ने उनले बताए।
त्यस्तै , नेपाल सुनचाँदी रत्न तथा आभुषण महासंघका अध्यक्ष किसान सुनुवारले यस्तो प्रावधानबाट सरकारको राजस्व समेत बढ्न नसक्ने बताए। राजस्व वृद्धिको लागी करको दायरा र व्यवसायको अभिवृद्धि गर्नुपर्ने उनले बताए। त्यसैले व्यवसायीका जायज मागहरु सरकारले पुरा गर्नुपर्नेमा उनले जोड दिए।
