१० चैत, काठमाडौं । सार्वजनिक यातायात केन्द्रीय महासंघ, नेपालले यातायात व्यवसायीका समस्या समाधान गराउन सरकारको ध्यानाकर्षण तथा समन्वय गर्ने र त्यसका लागि आवश्यक परेमा सडक आन्दोलनमा समेत जाने निर्णय गरेको छ। बुधबार जोरपाटीमा सम्पन्न महासंघको तेस्रो पूर्ण बैठकले यातायात व्यवसायीहरुको हितमा यातायात व्यवसायी राष्ट्रिय महासंघसंग कार्यगत एकताको लागि सकारात्मक पहल गर्ने समेत निर्णय गरेको छ।

तेस्रो पूर्ण बैठकको निर्णय सार्वजनिक गर्दै सार्वजनिक यातायात केन्द्रीय महासंघका अध्यक्ष डा. डोल नाथ खनालले रिक्त रहेको सचिव पदमा राजकुमार श्रेष्ठलाई नियुक्त गरिएको जानकारी दिए।

“संगीत रोयल्टी यातायात व्यवसायीहरूबाट उठाउने कुराको महासंघले सुरुदेखि नै विरोध गर्दै आएकोमा राज्यका सम्बन्धित निकायमा समेत उक्त कुरा राख्ने निर्णय बैठकले गरेको छ” , अध्यक्ष खनालले भने, “त्यससँगै महासंघको प्रदेश कमिटीहरुको भेला सम्पन्न गर्दै केन्द्रीय स्तरको भेला काठमाडौंमा गर्ने निर्णय बैठकले गरेको छ।”

बैठकमा महासंघका संस्थापक अध्यक्ष एवं संरक्षक होम प्रसाद अधिकारीले यातायात क्षेत्रका समस्या समाधान गर्नका लागि छुट्टै यातायात सुधार आयोग गठन गर्नुपर्ने आवश्यकता रहेकोमा जोड दिए।

महासंघको तेस्रो पूर्ण बैठकको संचालन गरेका महसचिव भरत नेपालले यातायात क्षेत्रका समस्या समाधान गर्न महासंघले राष्ट्रिय नीति निर्माण गर्नमा नेतृत्व गर्ने बताए। बैठकमा महासंघका प्रदेश अध्यक्षहरु तथा केन्द्रीय सदस्यहरुले धारणा राखेका थिए।

बैठककै अवसरमा महासंघमा विभिन्न भूमिकामा रहेर योगदान गर्ने व्यक्तित्वहरुलाई सम्मान तथा प्रमाणपत्र पनि प्रदान गरिएको थियो । सो अवसरमा महासंघका अध्यक्ष डा. डोलनाथ खनाललाई विद्यावारिधी उपाधी हासिल गरेकामा सम्मानित गरिएको थियो । त्यससँगै , कानूनी सल्लाहकार मनिष कुमार श्रेष्ठ , सल्लाहकार डा. तारा बहादुर कुँवर , उपत्यका उपाध्यक्ष कर्ण बहादुर खत्री , वर्गीय संयोजक रोम बहादुर श्रेष्ठ , महासंघका उपाध्यक्ष भिम बहादुर बस्नेत , केन्द्रीय सदस्यहरु लगायतलाई सम्मान र प्रमाणपत्र प्रदान गरियो ।