सानिमा जिआईसी इन्स्योरेन्स लिमिटेडले दियो ७.५% बोनस शेयर
काठमाडौं । सानिमा जिआईसी इन्स्योरेन्स लिमिटेडको सातौं वार्षिक साधारणसभाले हाल कायम चुक्ता पूँजीको ७.५ प्रतिशत बोनस शेयर र ०.३९४७ प्रतिशत नगद लाभांश (कर समेत) वितरणको प्रस्ताव पारित गरेको छ । सभा कम्पनीका अध्यक्ष कुनाल कयालको अध्यक्षतामा काठमाडौंको कालिकास्थानस्थित अमृतभोगमा बिहीबार ( २१ चैत ) सम्पन्न भएको हो ।
साधारणसभाले कम्पनीमा २५ प्रतिशत हकप्रद शेयर संशोधन गरी १७ प्रतिशत हकप्रद जारी गर्ने, गत आवमा भएको खर्च अनुमोदन गर्ने, सञ्चालक समितिको बैठक भत्ता संशोधन गर्ने र प्रबन्धपत्र तथा नियमावलीमा संशोधन गर्न सञ्चालक समितिलाई अख्तियारी दिने प्रस्ताव पनि पारित गरेको छ ।
त्यसैगरी गत आर्थिक आवको वित्तीय विवरणहरू पारित गरी चालू आवको लागि लेखापरीक्षक नियुक्ति र पारश्रमिक निर्धारण गर्ने प्रस्ताव पनि सभाले टुङ्ग्याएको छ ।
सभाका अध्यक्ष कुनाल कयालले सभामा सम्पूर्ण शेयरधनीहरुले राखेका कुराको जवाफ दिँदै आउँदो सभा समयमै सम्पन्न गर्ने र कम्पनीको व्यवसाय बृद्धिको लागि व्यवस्थापक तथा सम्पूर्ण सञ्चालक कटिबद्ध भएर लागेकोे बताएका छन् ।
सातौ साधारणसभा तथा लाभांश वितरण प्रयोजनार्थ कम्पनीले चैत ८ गते बुक क्लोज गरेको थियो । बुक क्लोजका आधारमा चैत ७ गतेसम्म कायम शेयरधनीहरूले मात्र लाभांश प्राप्त गर्नेछन् ।