२६ चैत, काठमाडौं । नेपाल वैदेशिक रोजगार व्यवसायी संघको निर्वाचन यहि चैत २९ गते हुँदैछ । नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले निर्वाचनको लागि सम्पुर्ण तयारी पूरा भएको जानकारी दिएका छन् । यसपटक चुनावी मैदानमा व्यवसायीका दुईवटा प्यानल सार्वजनिक भएका छन् । अहिले दुबै समूहहरु आ-आफ्नो समूहको जित हात पार्ने लक्ष्य सहित चुनावी प्रचारमा लागेका छन् ।

सोमबार पनि भुवन गुरुङ समुह र नरेश गेलाल समूहले फरक फरक स्थानमा कार्यक्रम राखेर आफ्नो प्रतिबद्धता व्यवसायीमाझ ब्यक्त गरेका थिए । व्यवसायीका अनुसार यसपटकको निर्वाचनमा २०० भन्दा बढी नयाँ व्यवसायी थपिएका छन । चुनावी माहोल तातीरहेका बेला दुबै समुहले जित्ने दावी गर्दै आएका छन ।संघमा ९०३ मतदाता रहेका छन । यसपटक दुबै समूह बीच कडा भिडन्त हुने निश्चित छ ।

लोकतान्त्रिक एशोसिएसन र गणतान्त्रिक मञ्चको संयुक्त प्यानल भुवनसिंह गुरुङको नेतृत्वमा बनेको छ । उक्त प्यानलमा नरेन्द्रप्रसाद ढकाल प्रथम उपाध्यक्ष पदका उम्मेदवार रहेका छन् । देवकुमार खोखाली द्वितिय उपाध्यक्ष, हर्कबहादुर लिम्बु तृतिय उपाध्यक्ष, महेश कुमार बस्नेत महासचिव पदका उम्मेदवार रहेका छन् । त्यस्तै, कुन्छादोर्जे डिम्दोङ सचिव पदका उम्मेदवार र बिक्रम श्रेष्ठ कोषाध्यक्ष पदका उम्मेदवार रहेका छन् । राज लामा तामाङ, कृष्ण ढकाल, भरत सापकोटा, बिधा लक्ष्मी बज्राचार्य, सुवर्ण लामा। देवीप्रसाद गिरी, रेखा शर्मा, दिपककुमार राय, सुमनराज पाण्डे, गिता राउत सदस्य पदका उम्मेदवार रहेका छन् ।

यस्तै संयुक्त व्यवसायिक समूहमा एमाले निकट व्यवसायीहरुले नरेश गेलालको प्यानलबाट उम्मेदवारी दिएका छन् । एमाले निकट प्यानलमा काँग्रेस निकट व्यवसायीको पनि सहयोग रहेको छ भने प्रथम उपाध्यक्ष र महासचिव एमाले प्यानलबाट काँग्रेस निकट व्यवसायीले पाएका छन् । सुजित कुमार श्रेष्ठ प्रथम उपाध्यक्ष पदका उम्मेदवार, मधुकर रिजाल द्वितीय उपाध्यक्ष पदका उम्मेदवार, बैकुण्ठप्रसाद पौडेल तृतिय उपाध्यक्ष, कर्णराज कटुवाल महासचिवमा उम्मेदवार रहेका छन् । त्यस्तै, अनिल बोगटी सचिव पदका उम्मेदवार, धनमाया सिन्जाली कोषाध्यक्ष पदका उम्मेदवार रहेका छन् । चन्द्रबहादुर लिम्बु, रमा खडका, देउमान नेम्बाङ, राजेन्द्र बस्नेत, दिनेश बस्नेत, छत्रबहादुर बस्नेत, हेमा गुरुङ, युबराज देवकोटा, कामेश्वर साह राहुल र राजेश यादव सदस्यका उम्मेद्धावर रहेका छन् ।

यसैगरी, स्वतन्त्र उम्मेदवारमा प्रथम उपाध्यक्ष अख्तर हुसेन र सचिवमा ईश्वर सापकोटाले उम्मेदवारी दिएका छन । यसभन्दा अघि संघको फागुन २ गते ३० औँ र ३१ औँ साधारणसभा बोलाइएको थियो । तर, उम्मेदवार विवादले रोकिएको थियो ।