विभिन्न ऐनमा गरिएको संशोधनले अर्थतन्त्रलाई चलायमान बनाउनेछ: अर्थमन्त्री पौडेल
काठमाडौं । अर्थमन्त्री विष्णुप्रसाद पौडेलले सरकारले हालै अध्यादेश मार्फत् विभिन्न ऐनमा गरेको संशोधनले निजी क्षेत्र उत्साहित भएको र यसले अर्थतन्त्रलाई चलायमान बनाउने बताएका छन्। आइतबार ( ६ माघ) अर्थमन्त्रालयमा आयोजित पत्रकारसंगको अन्तर्कृया कार्यक्रममा अर्थमन्त्रीले यस्तो बताएका हुन्।
अर्थमन्त्री पौडेलले भने,’ सरकारले विभिन्न ऐनमा गरेको पछिल्लो संशेधनपछि अहिले निजी क्षेत्र उत्साहित छ।यसले अर्थतन्त्र चलयमान गराउँछ।’ उनले निजी क्षेत्रका छाता संगठनले प्रधानमन्त्रीसँग भेटेर धन्यवाद दिएको स्मरण गर्दै उनले यसबाट निजी क्षेत्रको मनोबल बढाएको पुष्टि हुने बताए।
अर्थमन्त्री पौडेलले विगतमा प्रतिकूल देखिएका सूचकहरू अहिले सकारात्मक बन्दै जान थालेको बताए। उनले अहिले पुँजीगच खर्चमा गुणात्मक सुधार आवश्यक रहेको र बजेट क्यालेन्डर सुधार गरिएको जानकारी दिए।
त्यस्तै ,सरकारले खडा गरिएको कोषमा भएको रकम सोही कोषका उद्देश्य अनुसार नै खर्च हुने स्पष्ट पारे। सरकारले यस्ता कोषमा रहेको रकम सञ्चित कोषमा आउने व्यवस्था गरिएपछि यस्तो रकमको दुरूपयोग हुन सक्ने भन्दै विरोध भइरहेको छ। अहिले एक सय ७५ प्रकारका कोष छन्। यी कतिपय कोषको रकम उपयोग नहुने तर सरकार घाटामा देखिने गरेको भन्दै यसलाई सञ्चित कोषमा देखाउने उद्देश्यले मात्रै ल्याइएको बताइएको छ।
साथै, आफू सरकारमा आउँदा ओरालो लागिरहेको अर्थतन्त्रलाई सुधारतर्फ लगेको र यो सरकारले काम गर्नका लागि आवश्यक कानून निर्माण गरेर अगाडि बढीरहेको मन्त्री पौडेलले जनाए ।