वाणिज्य बैंकहरुले कमाए ६४ अर्बभन्दा बढी नाफा

 

२१ साउन , काठमाडौं । वाणिज्य बैंकहरुको आर्थिक वर्ष २०८०/८१ को औसत नाफामा वृद्धि भएको छ। बैंकहरुले प्रकाशित गरेका वित्तीय प्रतिवेदन अनुसार बैंकहरुले असार मसान्तसम्म ६४ अर्ब १५ करोड ३० लाख रुपैयाँ नाफा गरेका छन् । यो अघिल्लो वर्षको यसै अवधिको तुलनामा १३.४० प्रतिशतले बढी हो। अघिल्लो वर्ष २० वटा वाणिज्य बैंकले ५६ अर्ब ५७ करोड ४४ लाख रुपैयाँ नाफा आर्जन गरेका थिए ।

तर सबै बैंकहरुले नाफा बढाएका भने होइनन् । १० वटा बैंकले नाफा बढाउँदा बाँकी १० वटा बैंकको नाफामा भने गिरावट आएको छ । नाफा कमाउने बैंकहरुमा नबिल बैंक, नेपाल इन्भेष्टमेन्ट मेगा बैंक, प्रभु बैंक प्राइम कमर्सियल बैंक, एभरेष्ट बैंक, कृषि विकास बैंकको नाफा बढेको छ । यस्तै नाफा बढाउनेमा लक्ष्मी सनराइज बैंक, हिमालयन बैंक, कुमारी बैंक र नेपाल एसबीआई बैंक रहेको छ ।

त्यस्तै, नाफा घट्नेमा ग्लोबल आइएमइ बैंक, राष्ट्रिय वाणिज्य बैंक, स्टाण्डर्ड चार्टड बैंक, सिद्धार्थ बैंक, सानिमा बैंक, एनएमबी बैंक, नेपाल बैंक, एनआइशी एशिया बैंक, सिटिजन्स बैंक र माछापुच्छ्रे बैंक रहेको छ ।

नबिल बैंक नाफाका आधारमा पहिलो स्थानमा रहेको छ । यो बैंक सबैभन्दा धेरै खुद नाफा कमाउने बैंक बनेको छ । यसले ७ अर्ब ६ करोड रुपैयाँ बराबरको खुद नाफा आर्जन गरेको छ । यो भनेको अघिल्लो वर्ष (२०७९/८०) को तुलनामा १०.२३ प्रतिशत धेरै हो ।

दोस्रो बढी नाफा ग्लोबल आइएमई बैंकको देखिएको छ । यसको नाफा अघिल्लो आर्थिक वर्षको भन्दा कम भए पनि समग्र बैंकहरुमा नाफाका आधारमा दोस्रो नाफा कमाएको विवरणमा देखिन्छ । ग्लोबल आइएमई बैंकले ६ अर्ब १ करोड नाफा कमाएको छ । यद्यपि अघिल्लो वर्षको तुलनामा गत वर्ष यसको खुद नाफा भने १०.१३ प्रतिशत घटेको हो ।

तेस्रो बढी नाफा नेपाल इन्भेष्टमेन्ट मेगा बैंकको देखिएको छ । यस बैंकले ५ अर्ब १० करोड रुपैयाँ नाफा कमाएको छ ।यसको नाफा ३९.७१ प्रतिशतले बढेको हो ।

चौथो नम्बरमा प्रभु बैंक परेको छ । यस बैंकले ४ अर्ब ४८ करोड रुपैयाँ नाफा कमाएको छ । अघिल्लो वर्षको तुलनामा यस वर्ष १४ सय ९९ प्रतिशतले नाफा बढाएको हो । नाफाको वृद्धिदर भने यसको बढी छ । तर खुद नाफामा भने प्रभु चौथो नम्बरमा छ ।

पाँचौँ नम्बरमा परेको प्राइमले ३ अर्ब ७७ करोड रुपैयाँ कमाउँदा छैटौँ नम्बरमा परेको एभरेष्ट बैंकले ३ अर्ब ७० करोड नाफा आर्जन गरेको छ । नाफाका आधारमा सातौँ नम्बरमा कृषि विकास बैंक छ भने राष्ट्रिय वाणिज्य बैंक आठौँ नम्बरमा छ ।

त्यस्तै, सबैभन्दा कम नाफा कमाउने  माछापुच्छ्रे बैंकको नाफामा  अघिल्लो वर्षको तुलनामा २३.०९ प्रतिशतले गिरावट आएको छ । असार मसान्तसम्म यस बैंकले १ अर्ब २५ करोड रुपैयाँ नाफा गरेको छ ।

 

The post वाणिज्य बैंकहरुले कमाए ६४ अर्बभन्दा बढी नाफा first appeared on Khabar Breaking.