१३ मंसिर, काठमाडौं । फिनल्याण्डका वैदेशिक व्यापार तथा विकास मन्त्री भीले ट्याभियोको उपस्थितिमा वर्ल्डलिंकका अध्यक्ष दिलिप अग्रवाल र फिनफण्डको तर्फबाट वरिष्ठ लगानी प्रबन्धक कुट्टी किल्पेलेइनले लगानीसम्बन्धी सम्झौतापत्रमा हस्ताक्षर गरेका छन । बिहीवार काठमाडौंमा आयोजित एक कार्यक्रममा लगानीसम्बन्धी सम्झौतापत्रमा हस्ताक्षर गरेका हुन । विकासशील मुलुकहरूमा लगानी गर्ने फिनल्यान्डको सरकारी कम्पनी फिनफन्डले वर्ल्डलिंकमा १ करोड युरो अर्थात् करिब १ अर्ब ४३ करोड रुपैयाँ लगानी गर्ने भएको हो ।
फिनफन्ड फिनल्यान्डको विकास वित्त प्रदायक तथा इम्प्याक्ट इन्भेस्टर हो । उसले विश्वव्यापी विकास चुनौतीको समाधान गर्ने क्षेत्रमा विकासशील मुलुकहरूमा लगानी गर्ने जनाएको छ । फिनफन्डले हरेक वर्ष २० देखि २० करोड युरो लगानी गर्ने गरेको जनाएको छ । उसले हालसम्म १ अर्ब २२ करोड युरो लगानी गरिसकेको र त्यसमध्ये आधा अफ्रिकामा भएको पनि जनाएको छ । ३० वर्ष पुरानो कम्पनीको हालको मूल्यांकन ३० अर्ब रुपैयाँ छ । कम्पनीले तेस्रो चरणको विदेशी लगानीअन्तर्गत फिनफन्डको लगानी भित्र्याएको हो ।
फिनफण्डको लगानी विद्यमान फाइबर नेटवर्क बिस्तार गर्न प्रयोग गरिने वल्र्डलिंकले जनाएको छ । ‘नेपालको झन्डै आधा जनसंख्या ब्रोडब्यान्ड इन्टरनेटको पहुँचबाहिर रहेको, शहरी र ग्रामीण क्षेत्रमा उल्लेखनीय असमानता रहेको सन्दर्भमा यो लगानीबाट खुल्ने विश्वस्तरीय डाटा सेन्टरले नेपालको कनेक्टिभिटीमा सुधार र आर्थिक वृद्धिलाई टेवा पुर्याउनेछ,’ वल्र्डलिंकले जनाएको छ ।
The post वर्ल्डलिंक र फिनफण्ड बीच लगानीसम्बन्धी सम्झौतापत्रमा हस्ताक्षर first appeared on Khabar Breaking.
