१५ साउन, दाङ । नेकपा एमालेका महासचिव शंकर पोखरेलले राष्ट्रिय दल बन्न ३ प्रतिशत मात्रै थ्रेसहोल्ड मत आवश्यक पर्ने संवैधानिक व्यवस्था भएकाले राजनीतिक अस्थिरता बढेकाले थ्रेसहोल्डको प्रतिशत बढाउन संविधान संशोधन गरिने बताएका छन ।
मंगलबार प्रेस चौतारी दाङले घोराहीमा गरेको पत्रकार भेटघाटमा महासचिव पोखरेलले यस्तो बताएका हुन । सरकार बनाउँदा साना दलले गर्ने बार्गेनिङका कारण सरकार अस्थिर हुने भएकाले त्यसको अन्त्य गर्ने अभियानमा एमाले हिँडेको उनको भनाइ छ ।
उनले लोकतन्त्रको स्थायित्वका लागि एमाले र कांग्रेसबीच सत्ता सहकार्य भएको बताए । राजनीतिक अस्थिरताका कारण लोकतन्त्रमाथि नै प्रश्न उठ्न थालेपछि एमाले र कांग्रेस मिल्नु परेको उनको भनाई छ । राजनीतिक अस्थिरताले अहिलेको शासकीय व्यवस्थामाथि नै अविश्वास पैदा हुँदै गयो । त्यसको अन्त्य गर्न संविधान संशोधन आवश्यक छ । एक्लै नसकिने भएकाले कांग्रेसको साथ खोजिएको हो, उनले भने ।
The post लोकतन्त्रको स्थायित्वका लागि एमाले र कांग्रेसबीच सत्ता सहकार्यः शंकर पोखरेल first appeared on Khabar Breaking.
