काठमाडाैं । लुम्बिनी विकास बैंक लिमिटेडको १७औं वार्षिक साधारणसभा सम्पन्न भएकाे छ । बैंक संचालक समितिका अध्यक्ष चिन्तामणी भट्टराईको अध्यक्षतामा पुष २९ गते काठमाडौंमा सम्पन्न सभाले ७ प्रतिशत लाभांश वितरण गर्ने प्रस्तावको अनुमोदन गरेको छ।

बैंकले आर्थिक वर्ष २०८०/८१ मा शेयरधनिहरुलाई ४ प्रतिशत नगद लाभांश तथा ३ प्रतिशत बोनस शेयर सहित कुल ७ प्रतिशत लाभांश वितरण गरेको हो ।

सभाले समीक्षा आर्थिक वर्ष २०८०/८१ को वार्षिक प्रतिवेदन तथा वित्तीय प्रतिवेदन पनि पारित गरेको छ । साथै, आगामी आर्थिक वर्ष २०८१/८२ का लागि लेखापरीक्षकको नियुक्ति पनि गरिएको छ। सभामा उपस्थित शेयरधनीहरूले राखेका जिज्ञासाहरूबारे अध्यक्ष भट्टराई र प्रमुख कार्यकारी अधिकृत नरेश सिंह बोहराले स्पष्ट पारेका थिए ।

यस लुम्बिनी विकास बैंकले देशका ७ वटै प्रदेशमा शाखाहरू विस्तार गर्दै कारोबार गरिरहेको छ । हालसम्म बैंकले ८९ वटा शाखा कार्यालय र एक विस्तारित शाखा (एक्सटेन्सन काउण्टर) मार्फत उच्चस्तरीय र सुरक्षित बैंकिङ्ग सेवा प्रदान गरिरहेको छ । लुम्बिनी विकास बैंकले आगामी दिनहरूमा थप सुदृढ सेवा र आर्थिक वृद्धि हासिल गर्ने प्रतिवद्धता जनाएको छ ।