राष्ट्रिय मुक्ति पार्टीको केन्द्रीय कार्यसमितिको बैठक राजधानीमा शुरु
१२ फागुन , काठमाडौं । राष्ट्रिय मुक्ति पार्टीको केन्द्रीय कार्यसमितिको बैठक सोमबार राजधानीमा शुरु भएको छ। गत असोजमा उक्त पार्टी गठन भए पश्चात यो पहिलो बैठक रहेको छ।
बैठकमा उक्त पार्टीका अध्यक्ष राजेन्द्र महतोले छलफलको लागी राजनीतिक तथा सांगठनिक प्रतिवेदन प्रस्तुत गरे। बैठकमा अबको दुई दिन यस प्रतिवेदन माथी छलफल हुनेछ।
बैठकमा प्रतिवेदन प्रस्तुत गर्दै उनले शाहवंश, राणाशासन, प्रजातंत्रदेखि गणतंत्रसम्मको शासनले एकल नस्लिय आत्मगौरबको सत्ता लाई नै निरन्तरता दिएकाले वाध्य भएर राष्ट्रिय मुक्ति क्रान्तीको बाटोमा हिडेको बताए।
‘नेपालमा विभिन्न समयमा आन्दोलन र क्रान्तीहरू हुँदै आएको इतिहास छ। राणाकालमा २००७ सालको क्रान्ती, पंचायत विरुद्धको संघर्ष हुँदै २०६२/६३ को आन्दोलनवाट संघिय लोकतंत्र र गणतंत्र त आयो। तर एकल राष्ट्रिय राज्य कायम रह्यो। एउटै जातीको नस्लिय शासन व्यवस्था अझै कायम छ’, महतोले भने, ‘विश्वमा असफल भइसकेको कम्युनिष्ट विचारधारा तथा पश्चिमा पूँजीवादी व्यवस्था नेपाल सुहाँउदो छैन । यसको एकमात्र विकल्प बहुलराष्ट्रिय लोकतंत्रमा आधारित राज्य प्रणाली हो भन्ने हाम्रो ठहर छ। यसले सबै राष्ट्रियता, जातियता र समुदायलाई समान अधिकार सहित अबसर दिनेछ ।’
साथै , उनले उपत्यकाको गैरन्यायिक सडक विस्तार, खोला नदी मापदण्डविरुद्ध, चुरे दोहन, वन विनाश तथा मधेस सरकारको बेथितिविरुद्ध संघर्ष गर्ने बताए ।
चुरे दोहन, वन विनास तथा मधेश सरकारको वेथितिविरुद्ध पार्टीले गरेको आन्दोनलका विषयमा परिषद् बैठकमा छलफल हुने उनको भनाइ थियो ।
‘संघर्षहरूको सम्बन्धहरूमा हामी यहाँ छलफल गर्छौँ । आगामी दिनमा गरिने संघर्षका बारेमा हामी आवश्यक निर्णय लिन्छौँ । त्यस्तै, कोशी प्रदेश नाम खारेजीको संघर्ष,’ महतोले भने, ‘मधेश सरकारको बेथितिविरुद्धको संघर्ष, चुरे दोहन, गिटी बालुवा उत्खनन तथा वन विनाशविरुद्धको संघर्ष, बागमती प्रदेश नाम खारेजीको संघर्ष ।’
विस्तारित बैठकमा अध्यक्ष महतो लगायत केन्द्रिय परिषद सदस्यहरूले पद तथा गोपनीयताको शपथ ग्रहण गरेका थिए।
राष्ट्रिय मुक्ति क्रान्तिको मुख्य नारा तथा सिद्धांत “अभियानमा निरन्तरता, संघर्षमा जोड र विद्रोहको तयारी” रहने उनले बताए।
राष्ट्रिय मुक्ति क्रान्ति हुँदै शुरु भएको आफ्नो अभियान पार्टी गठन भए पछि पनि अहिले सम्म गरेको काम संतोषजनक भएकोले भविष्यमा पनि सोचेजस्तो प्रगति हुने तथा सबै जनताहरूको सहयोग हुनेमा विश्वस्त रहेको कुरा बताए।
सो बैठकमा पुर्व मंत्री राम नरेश यादव, कौशल किशोर सिंह, संतोष मेहता,केशव झा, वुद्ध छिरिङ मोक्तान, रविन्द्र श्रेष्ठ, आर.के.तामाङ, अनिल महासेठ, कमला गुरुङ, सुमन सायमी, कुन्जिलाल यादव लगायत डेढ सय जना पार्टी नेता कार्यकर्ताहरुको उपस्थिती रहेको छ।
