राजसंस्था पक्षधरको प्रदर्शनीमा सरकारको निर्मम दमन; जनधनको क्षति
१५ चैत ,काठमाडौं । राजसंस्था पक्षधर नागरिकहरुको प्रदर्शनीमा सरकारले निर्मम दमन गरेको छ । प्रहरीले राजसंस्था पक्षधरको सभाको मंचमा ताकेर अश्रुग्याँस तथा रबरका गोलि प्रहार गर्दा शान्तिपूर्ण गर्न लागिएको आन्दोलन हिंसात्मक भएर जनधनको क्षति हुन पुगेको ‘राजसंस्था पुनःस्थापन जनआन्दोलन’ का नेताहरुले बताएका छन् । घरका छतहरुबाट पनि मंचमात्र ताकेर ढुंगा प्रहार भएको र ती प्रहरी हुन् कि माओवादी कार्यकर्ता हुन् थाहा नभएको उनिहरुले बताएका छन् ।
सभामा संयुक्त जनआन्दोलन समितिका संयोजक नवराज सुवेदी आउनासाथ मंचमा ताकेर अश्रुग्याँस हानिएको थियो । त्यसपछि उनलाई स्वयम्सेवकहरुले सुरक्षित स्थानमा लगेका थिए। मंचमा रहेका राप्रपाका नेताहरु रवीन्द्र मिश्र, धवलशमशेर राणालगायत पनि असुरक्षित बनेका थिए ।
प्रहरीको बल प्रयोगबाट केही प्रदर्शनकारीहरु घाइते बने । पहिलो चरणमा लाठी चार्ज र अश्रुग्याँस प्रहार गरेको सुरक्षाकर्मीले रबरका गोली र त्यसपछि गोली चलायो । एक जना प्रदर्शनकारीको कम्मरमा गोली लाग्यो ।
उनलाई तत्काल तीनकुनेस्थित कान्तिपुर अस्पतालमा पुर्याइयो । प्राथमिक उपचारपछि अस्पतालले उनलाई वीर अस्पताल रेफर गर्यो । उपचारमा संलग्न चिकित्सकले उनको कम्मर छिनेर गोली भित्र पसेको बताए । उनलाई थप उपचारका लागि रेफर गरिएको छ।
यस्तै घाँटीमा गोली लागेका अर्का एक प्रदर्शनकारीको उपचारका क्रममा मृत्यु भएको छ । शुक्रबार साँझ गृह मन्त्रालयले पत्रकार सम्मेलन गरी एक व्यक्तिको मृत्यु भएको जानकारी दिएको छ । मृत्यु हुनेमा कीर्तिपुरका २९ वर्षीय सविन महर्जन रहेको खुलेको छ । उनको महाराजगन्जस्थित टिचिङ अस्पतालमा उपचारका क्रममा मृत्यु भएको हो ।
यस्तै प्रदर्शनकारीले तीनकुनैकै एक घरमा लगाएको आगलागीमा फसेर भिडियो पत्रकारको पनि मृत्यु भएको छ । भिडियो पत्रकार सुरेश रजक भएको पुष्टि भएको छ।
प्रदर्शनमा १५ सुरक्षाकर्मी र १५ प्रदर्शनकारी घाइते भएका छन् । प्रदर्शनमा सुरक्षाकर्मी र प्रदर्शनकारीबाहेक सर्वसाधारणसमेत घाइते भएका छन् ।
प्रदर्शनकारीहरूले सरकारले बल प्रयोग गरेको भन्दै झनै उग्र हिंसात्मक प्रदर्शन गरेपछि अन्ततः जिल्ला प्रशासन कार्यालय काठमाडौँले कर्फ्यु लगाएको छ । गौशालादेखि एयरपोर्ट, गैरीधारा, तीनकुने–कोटेश्वर, कोटेश्वर–जडीबुटी–बालकुमारी पुल, नयाँबानेश्वर–संखमुल, गौशाला–पुरानो बानेश्वर–नयाँ बानेश्वर क्षेत्रमा साँझ ४ः२५ देखि राति १० बजेसम्म कर्फ्यु लगाइएको हो । कर्फ्युपछि काठमाडौँका सडकमा नेपाली सेनालाई पनि खटाइएको छ ।
आजको आन्दोलनका कमान्डर दुर्गा प्रसाईँले आफूहरूले शान्तिपूर्ण रूपमा कार्यक्रम स्थलमा जाँदै गर्दा नपुग्दै प्रहरीले अश्रुग्याँस र लाठीचार्ज प्रहार गरेको बताएका छन् । तीनकुनेको घर–घरमा लुकेर प्रहरीले अश्रुग्याँस प्रहार गरी कार्यक्रम सुरु नै गर्न नदिएको आरोप उनले लगाएका छन् ।
त्यस्तै , गृह मन्त्रालयले शुक्रबार साँझ पत्रकार सम्मेलन गरेर तीनकुने क्षेत्रमा आन्दोलन नेतृत्व गरेका दुर्गा प्रसाईंलाई कानुनी दायरामा ल्याउने बताएको छ। गृहका सहसचिव छविलाल रिजालले पत्रकार सम्मेलन गर्दै प्रसाईंले आन्दोलन नेतृत्व गरेकाले उनलाई कानुनी दायरामा ल्याउने बताएका हुन्।
