राजनेता र राजनीतिज्ञको बीचमा ठूलो अन्तर छ

– भक्त केसी,
जनमत, विज्ञ विश्लेषण राजनीतिज्ञहरू भ्रममुक्त हुनुस् ,राजनेता र राजनीतिज्ञको बीचमा ठूलो अन्तर छ।

राजनेता: दीर्घकालीन सोच, राष्ट्रिय हितप्रति समर्पित, आफ्नो स्वार्थभन्दा माथि उठेर देश र जनताको भविष्य सोच्ने व्यक्ति।

राजनीतिज्ञ: तत्कालीन फाइदाका लागि राष्ट्रियता बेच्ने, चुनावी लाभका लागि विभाजनको राजनीति गर्ने, संकीर्ण सोच भएका व्यक्ति। नेपालमा राजनेताको अभाव र क्षणिक स्वार्थमा अल्झिएका राजनीतिज्ञहरूको हालीमुहाली छ। राष्ट्रियताका नारा त उठ्छन्, तर व्यवहारमा कार्यान्वयन शून्य छ। जनता हरेक चुनावमा आशावादी बन्छन्, तर नतिजा उही दोहोरीयो । जनताको शिक्षा, स्वास्थ्य, रोजगारी जस्ता मौलिक अधिकारको रक्षा हुन सकेको छैन। यी सबै प्रवृत्तिहरू परिवर्तन गर्न अब नयाँ पुस्ताले जिम्मेवारी लिनुपर्छ।

राजनीतिलाई पेशा होइन, सेवा बनाउने संस्कार बसाल्न जरुरी छ। अध्ययनशील, नीतिनिर्माणमा दक्ष, भूमाफियाबाट स्वतन्त्र र राष्ट्रियता प्रति इमान्दार नेतृत्वले मात्र नेपाललाई समृद्ध दिशामा लैजान सक्छ।
नेपालमा पछिल्ला वर्षहरूमा राजनीति नारा, प्रचार र भावनात्मक उक्साहटमा केन्द्रित हुँदै गएको देखिन्छ। वास्तविकतामा राजनीतिज्ञहरू तल्लो तहका जनताको मर्म र आवश्यकता बुझ्न असफल भइरहेका छन्। उनीहरू आफैं प्रचारको भ्रममा फसेका छन् र जनताले देखाउने क्षणिक समर्थनमा रमाइरहेका छन्। अध्ययन, अनुसन्धान र दीर्घकालीन नीति निर्माणमा गहिरो ध्यान नदिने प्रवृत्तिले नेपालको समग्र विकासमा गम्भीर असर परिरहेको छ।

अध्ययनशील राजनीतिज्ञको अभावमा देशले स्थायी समाधान खोज्न सकेको छैन। नेपालको प्रमुख राजनीतिक दलहरूमा पुरानै पुस्ताका नेताहरू हाबी छन्, जसको सोच र शैली झन्डै चार दशकअघि जस्तै पुरानै प्रवृत्तिमा सीमित देखिन्छ। आधुनिक युगका प्रविधि, अन्तर्राष्ट्रिय परिप्रेक्ष्य, र समावेशी विकासका एजेन्डाप्रति उनीहरू गम्भीर छैनन्।

यसैबीच, भूमाफियासँगको साँठगाँठमा राजनीतिज्ञहरूकै प्रत्यक्ष संलग्नता देखिएको छ। सहरीकरण, भौतिक पूर्वाधार निर्माण र सरकारी जग्गा हडप्ने खेलमा भूमाफियालाई राजनीतिक संरक्षण प्राप्त छ, जसले भ्रष्टाचारलाई संस्थागत गरिरहेको छ।

राष्ट्रियता जस्तो संवेदनशील विषयलाई पनि तत्कालीन स्वार्थअनुसार प्रयोग गर्ने प्रवृत्तिले राजनेताको अभाव प्रस्ट्याएको छ। दीर्घकालीन सोच, राष्ट्रिय हित र समर्पणको सट्टा चुनावी लाभका लागि विभाजनकारी राजनीति गर्नमै राजनीतिज्ञहरू सक्रिय देखिन्छन्। यसले आमजनता निराश बनाएको छ।

राजनीति, व्यापार, प्रशासन र भूमाफियाबीचको मिलेमतोमा सञ्चालन भइरहेको वर्तमान राजनीतिक संरचनाले सर्वसाधारण जनताको शिक्षा, स्वास्थ्य र रोजगारीका अधिकार सुनिश्चित गर्न सकेको छैन। चुनावपछि आशावादी बन्ने तर नतिजा उस्तै रहने चक्रबाट जनता मुक्त हुन सकेका छैनन्।

यो निराशाजनक अवस्थालाई तोड्नका लागि अब नयाँ पुस्ताको अध्ययनशील, इमानदार र राष्ट्रियताप्रति समर्पित नेतृत्व अपरिहार्य देखिएको छ। राजनीतिलाई सेवा होइन, पेशा बनाउने प्रवृत्ति अन्त्य नगरेसम्म जनताको हार निरन्तर जारी रहनेछ।
( यी लेखकका निजी विचार हुन्)