बेलायती राजकुमार दम्पती काठमाडौंमा
२२ माघ, काठमाडौं । बेलायतका राजकुमार एडवार्ड र उहाँकी श्रीमती सोफिया नेपाल आइपुग्नु भएको छ ।निजी भ्रमणका लागि राजकुमार दम्पती मङ्गलबार काठमाडौं ओर्लिनु भएको हो ।
उहाँहरुहरू ६ दिने भ्रमणका लागि निस्किएको बेलायती सञ्चारमाध्यम मिररले उल्लेख गरेको छ । नेपाल भ्रमणका क्रममा उहाँहरू पोखराको ब्रिटिश गोर्खा क्याम्पमा हालै बेलायती सेनामा छनोट भएकाहरूलाई ब्याज वितरणका लागि गरिने परेडमा सहभागी हुनुहुनेछ। साथै, अन्नपूर्ण हिमश्रृङ्खला र घान्द्रुकको समेत भ्रमण गर्नुहुने छ ।
नेपाल बसाइँको क्रममा एडवार्डले स्वास्थ्य सेवा, मानव बेचबिखन पीडित र लैङ्गिक हिंसा पीडितलाई सहयोग गर्ने संस्थाका प्रतिनिधिसँग भेट्ने कार्यक्रम छ । राजकुमार दम्पतीको नेपालमा सुरक्षा प्रबन्ध नेपाली सेनाले गरेको छ ।
