नेपाल सरकार र शिक्षक महासङ्घबीच नौ बुँदे सहमति
१७ बैशाख, काठमाडौँ । नेपाल सरकार र शिक्षक महासङ्घबीच नौ बुँदे सहमति भएको छ । वार्तापछि नेपाल सरकार र शिक्षक महासङ्घका प्रतिनिधिबीच नौ बुँदे सहमति भएको हो ।
सरकारका तर्फबाट शिक्षा, विज्ञान तथा प्रविधिमन्त्री रघुजी पन्त र शिक्षक महासङ्घका प्रतिनिधिबीच आज वार्ता सफल भएको हो । महासंघसँग भएको सहमतिलाई मन्त्रिपरिषदको बैठकले अनुमोदनसहित निर्णय गरेको छ।
मन्त्रिपरिषदको बैठकले माग पूरा गर्ने निर्णय गरेसँगै भोलिदेखि शिक्षक महासङ्घले आन्दोलनका सबै कार्यक्रम फिर्ता लिएर विद्यालय सञ्चालन गर्ने सहमति भएको छ ।
सहमति पछिको पत्रकार सम्मेलनमा शिक्षा मन्त्री पन्तले मन्त्रिपरिषद् बैठकले मागहरु अनुमोदन गरेको जानकारी दिनुभयो ।
सोही पत्रकार सम्मेलनमा नेपाल शिक्षक महासंघका अध्यक्ष लक्ष्मी किशोर सुवेदीले शिक्षकमा तत्काल पुरा हुन सक्ने माग मन्त्रिपरिषदले पूरा गरेको र कानूनसँग जोडिएको माग २०८२ असार १५ गतेभित्र शिक्षा ऐनमार्फत पूरा गर्ने सहमति भएको बताउनु भयो । अध्यक्ष सुबेदीका अनुसार भोलिदेखि नै सबै शैक्षिक क्रियाकलाप सुचारु गरिने छ ।
