११ वैशाख , काठमाडौं । नेपाल लोकतान्त्रिक यातायात व्यवसायी संघको दोस्रो राष्ट्रिय महाधिवेशन काठमाडौंमा शुरु भएको छ। बुधबार ( १० वैशाख ) संघका अध्यक्ष योगेन्द्रनाथ कर्माचार्यको सभापतित्व र नेपाली कांग्रेसका उपसभापति पूर्ण बहादुर खड्काको प्रमुख आतिथ्यमा सम्पन्न महाधिवेशनको समुद्घाटन समारोहमा पूर्वमन्त्रीहरू प्रकाश शरण महत, अर्जुन नरसिंह केसी लगायतको उपस्थिति रहेको थियो। दुई दिन चल्ने महाधिवेशनले नयाँ कार्यसमितिको पनि निर्वाचन गर्ने कार्यक्रम रहेको छ।

कार्यक्रमका प्रमुख अतिथि नेपाली कांग्रेसका कार्यवाहक सभापति समेत रहेका पूर्णबहादुर खड्काले कांग्रेस र एमालेबीच भएको सहमतिका आधारमा संविधान संशोधनको प्रक्रिया अगाडि बढाउने बताएका छन् । खड्काले संविधान संशोधनको काम अघि बढाउन ढिला भएको भन्दै दुईदलबीच भएको सहमतिको आधारमा कांग्रेस र एमालेको बीचमा कार्यदल बनाएर संशोधनको आधार तयार बनाउनुपर्ने उनले बताए ।

त्यसैका आधारमा अन्य दलहरूसँग छलफल गरेर सुझावका आधारमा संविधानलाई सुदृढ बनाउनुपर्नेमा उनले जोड दिए । उनले संविधानमा भएको अधिकारलाई घटाउने गरी नभई बढाउने गरी संशोधनको बहस हुनुपर्ने बताए । खड्काले सरकारले आफ्नो कमीकमजोरी सच्चाउँदै अघि बढ्नुपर्ने भन्दै दुई दलबीच भएको सहमति दायाँबायाँ नहुने स्पष्ट पारे ।

आम नागरिकको भावनालाई बुझेर असन्तुष्टिहरूलाई सम्बोधन गर्दा विकास कामलाई गति दिनुपर्ने उनले बताए ।