काठमाडौं । नेपाल फाइनान्स लिमिटेडले ३२औं वार्षिक साधारण सभा सम्पन्न गर्दै समीक्षा आर्थिक वर्ष २०८०/८१ को वार्षिक तथा वित्तीय प्रतिवेदन पारित गरेको छ।

संस्थाका सञ्चालक समितिका अध्यक्ष प्राध्यापक हिरेन्द्रमान प्रधानको सभापतित्वमा मंगलबार ( ८ माघ ) ललितपुरमा सम्पन्न भएको साधारणसभाले आर्थिक वर्ष २०८०/८१ को वार्षिक वित्तीय विवरणहरू पारित गर्नुको साथै आव २०७९/८० को लागि लेखापरीक्षक नियुक्ति गर्ने निर्णय पारित गरेको हो ।

त्यस्तै , सभाले सर्वसाधारण सेयरधनीहरूको तर्फबाट सञ्चालक समितिमा प्रतिनिधित्व गर्ने सञ्चालक पदमा योगराज कँडेल शर्मा निर्विरोध निर्वाचित गरेको छ ।

यसैगरी, सभाले अन्य बैंक तथा वित्तीय संस्थालाई गाभ्ने/गाभिने एवम् प्राप्ति गर्ने कार्यको लागि सञ्चालक समितिलाई पूर्ण अख्तियारी प्रदान गरेको छ ।

सभाले आगामी दिनहरूमा खराब कर्जा नेपाल राष्ट्र बैंकले तोकेको सीमाभित्र ल्याउन र नपुग भएको चुक्ता पुँजी पुर्‍याउने गरी कार्य गर्ने जनाएकाे छ । कार्यक्रममा सेयरधनीहरूका प्रश्न र जिज्ञासाहरूको संस्थाका अध्यक्ष एवम् सभाका सभापति प्रधानले गरेका थिए ।

नेपाल फाइनान्स निजी क्षेत्रको लगानीबाट २०४९ सालमा स्थापित पहिलो फाइनान्स कम्पनी हो । संस्थाले हाल देशका विभिन्न स्थानमा रहेका १२ वटा शाखा कार्यालय र काठमाडौंको कालीमाटीमा रहेका एक्सेन्टेन्सन काउण्टरमार्फत वित्तीय सेवा प्रदान गर्दै आइरहेको छ।