६ फागुन, काठमाडौं । एमालेनिकट नेपाल निजामती कर्मचारी संगठनले देशको सार्वजनिक प्रशासन र निजामती प्रशासनको समृद्धिमा योगदान पुऱ्याउने गरी नीति निर्माण र संगठनको संस्थागत सुदृढीकरणको अभियानका साथ अगाडि बढ्ने प्रतिबद्धता व्यक्त गरेको छ। संगठनको २०८१ माघ ३० देखि फागुन ३ गतेसम्म सम्पन्न बाह्रौं महाधिवेशनबाट भवानी न्यौपाने दाहालको अध्यक्षतामा नवनिर्वाचित केन्द्रीय कार्यसमितिले मंगलबार पत्रकार सम्मेलनमार्फत बाह्रौं महाधिवेशनबाट अगाडि सारेका विभिन्न २८ बुँदे कार्यभार र प्रतिबद्धता सार्वजनिक गरेको हो। आजको पत्रकार सम्मेलनको समन्वय तथा संचालन संगठनका महासचिव रामचन्द्र अधिकारीले गरेका थिए।

कार्यक्रममा संगठनकी नवनिर्वाचित अध्यक्ष दाहालले संगठनमा सहमतिमा नै नेतृत्व चयन भएको हुँदा कुनै तिक्तता नरहेको र महिला नेतृत्व हुँदा सबैतिर राम्रो सन्देश पनि गएको बताइन। उनले वहालवाला, अस्थायी , करार र सेवा निवृत कर्मचारीहरुको हितमा काम गर्दै विशाल कर्मचारी संगठन निर्माणमा काम गर्ने प्रतिबद्धता व्यक्त गरिन।

“जनताले कर्मचारीवर्गलाई हेर्ने दृष्टिकोणलाई सकारात्मक बनाउने गरि काम गर्ने आवश्यक छ। हरेक सदस्यले “मुस्कान सहितको सेवा प्रवाह ” को प्रत्याभूती गर्दै “आफैंबाट नमस्कार ” का साथ ट्रेड युनियनका कर्मचारीले काम गर्दैनन् भन्ने छाप तोड्ने गरि काम गर्नेछौं “, उनले भनिन् ।

नेकपा एमालेका अध्यक्ष तथा प्रधानमन्त्री केपी शर्मा ओलीद्वारा समुद्घाटन गरिएको महाधिवेशनमा केन्द्रीय कार्यसमितिका पदाधिकारी तथा सदस्य प्रदेश, जिल्ला विभागीय कार्य समितिका अध्यक्ष लगायत ७३९ जनाको सहभागिता रहेको संगठनले जनाएको छ।

बाह्रौं महाधिवेशनले भवानी न्यौपाने दाहालको अध्यक्षतामा १७१ सदस्यीय केन्द्रीय कार्य समिति, ५ सदस्यीय लेखापरीक्षण आयोग, ५ सदस्यीय अनुशासन आयोग, ५ सदस्यीय नीति अनुसन्धान आयोग, ११ सदस्यीय विज्ञान तथा प्रविधि आयोग र ७१ जना केन्द्रीय परिषद् सदस्य सर्वसम्मत रुपमा निर्वाचित गरेको पत्रकार सम्मेलनमा जानकारी दिइयो ।

वरिष्ठ उपाध्यक्षमा रेवन्त गौतम र प्रभाषप्रसाद साह, उपाध्यक्षमा युवाचन्द्र घिमिरे, विष्णु अर्याल, कृष्णबहादुर केसी र विजयालक्ष्मी सुवेदी तथा महासचिवमा रामचन्द्र अधिकारी निर्वाचित भएका छन् ।

यस्तै, संगठनको उपमहासचिव वामदेव ओली, सूर्यबहादुर कुँवर र कमला दाहाल निर्वाचित भए । यस्तै, सचिवमा देवी पराजुली, राजबहादुर पछाई, तेजप्रकाश भण्डारी, ओमबहादुर कठायत र गोविन्द अधिकारी, कार्यालय सचिवमा पदमबहादुर शाही, कोषाध्यक्षमा कोषाध्यक्षमा यमकुमारी सापकोटा र सहकोषाध्यक्षमा दीपक शर्मा पौडेल निर्वाचित भएका छन्।

महाधिवेशनले प्रदेश इन्चार्ज पनि तोकेको छ । जसअनुसार कोशीमा ध्रुवबहादुर कार्की, मधेशमा नौतम पोखरेल, बागमतीमा पुरुषोत्तम रायमाझी, गण्डकीमा भरत भुसाल, लुम्बिनीमा कविसिंह कठायत, कर्णालीमा तुलाराम गिरी, सुदूरपश्चिममा प्रकाशबहादुर खड्का र उपत्यका विशेषमा गणेशप्रसाद आचार्यलाई तोक्ने निर्णय गरेको छ ।

महाधिवेशनले निवर्तमान अध्यक्ष लेखनाथ कोइरालाद्वारा प्रस्तुत “सांगठनिक प्रतिवेदन” र कोषाध्यक्ष गणेश प्रसाद आचार्यद्वारा प्रस्तुत “आर्थिक प्रतिवेदन” सुझाव सहित पारित गरेको थियो।