११ माघ , काठमाडौं । नेपाल कानून व्यवसायी परिषद पार्षदको यही माघ २६ गते शनिबार हुने निर्वाचनमा परिषदको बागमती प्रदेश पार्षद पदमा डेमोक्रेटिक लयर्स एशोसिएसनको तर्फबाट वरिष्ठ अधिवक्ता पर्शुराम कोइरालाले उम्मेदवारी घोषणा गरेका छन् । कोइरालाले शुक्रबार पत्रकार सम्मेलन मार्फत नेपाल कानून व्यवसायी परिषदलाई नवीनतम् ढंगले अगाडि बढाउने प्रतिवद्धतासहित उम्मेदवारी सार्वजनिक गरेका हुन् ।

“तपाईं कानून व्यवसायीहरुको अमूल्य मत प्राप्त गरी काम गर्ने मौका पाएं भने नेपाल कानून व्यवसाय परिषदको बागमती प्रदेशको पार्षदको हैसियतले कानून व्यवसायको उत्तरोतर प्रगति र पेशाको विकास, कानूनी शिक्षाको समय सापेक्ष परिमार्जन, महिला कानून व्यवसायीहरुलाई कानून व्यवसाय गर्न सक्ने वातावरणको निर्माण, नव प्रवेशी कानून व्यवसायीहरुका लागि छुट्टै योजना, लामो समयदेखि कानून व्यवसाय गरि आउनु भएका अनुभवि कानून व्यवसायीको निमित्त आर्थिक टेवाका कार्यक्रम, व्यवसायिक आचरण र मर्यादाको परिपालनाका साथै कानून व्यवसायीका चौतर्फी विकासमा निमित्त हाम्रो तर्फबाट जारी भएको घोषणा पत्रमा उल्लिखित व्यहोरा बमोजिम कार्य गर्नेछु भनी यहांहरु सबैलाई विश्वास र भरोसा दिलाउन चाहान्छु ।” पत्रकार सम्मेलनमार्फत वरिष्ठ अधिवक्ता कोइरालाले भनेका छन् ।

करीव ११ हजार मतदाता रहेको बार काउन्सिलको लागि माघ २६ गते शनिवार देशभर मतदान हुँदैन । सातवटा प्रदेशबाट एकजनाको दरले काउन्सिलमा ७ जना निर्वाचित हुने व्यवस्था छ ।

बार काउन्सिलले वकिललाई लाइसेन्स दिनदेखि तालिमलगायतका नियामक निकायको काम गर्छ । लाइसेन्सप्राप्त नविकरण गरेका सबै कानून व्यवसायी काउन्सिलका मतदाता हुन् । यसको अध्यक्ष महान्यायाधिवक्ता हुन्छन् भने उपाध्यक्ष नेपाल बारको अध्यक्ष हुन्छन् । सबैभन्दा धेरै मतदाता बागमतीमा रहेकाले बागमतीको परिणामलाई महत्वका साथ हेरिएको छ ।

बार काउन्सिलको निर्वाचनले नेपाल बारको आगामी निर्वाचन परिणामको संकेत गर्न सक्ने वकिलहरु बताउँछन् ।यसपटक नेपाल बारमा पनि एमाले र माओवादी मिलेर पुनरागमन गर्ने प्रयासमा छन् ।