१९ माघ , काठमाडौं । नेपाल आयुर्वेद औषधी व्यवसायी संघको काठमाडौं ,भक्तपुर ,ललितपुर जिल्लाको दोश्रो संयुक्त अधिवेशन शनिबार आयोजना गरिएको छ। संघका काठमाडौं जिल्लाका अध्यक्ष होमबहादुर नगरकोटीको सभापतित्व तथा औषधी व्यवस्था विभागका महानिर्देशक नारायण ढकालको प्रमुख आतिथ्यमा काठमाडौंको नयाँ बजारमा सम्पन्न अधिवेशनमा नेपाल आयुर्वेद क्याम्पसका प्रमुख शिव मंगल प्रसाद सिंह , नेपाल आयुर्वेद चिकित्सा परिषदका रजिस्ट्रार निर्मल भुसाल , आयुर्वेद अनुसन्धान केन्द्रका प्रमुख डा. रामानन्द यादव , आयुर्वेद डाक्टर तथा औषधी उत्पादकहरुको सहभागिता रहेको थियो।

अधिवेशनको समुद्घाटन समारोहमा कार्यक्रमका प्रमुख अतिथि औषधी व्यवस्था विभागका महानिर्देशक नारायण ढकालले आयुर्वेद चिकित्सा पद्धतिको विकास र संरक्षण गर्ने पहिलो जिम्मेवारी सम्बन्धित क्षेत्रका विज्ञ र व्यवसायीहरुको नै भएको बताए ।त्यसका लागि राज्यका तर्फबाट पनि आवश्यक नीति र श्रोतका लागी सहयोग गर्न तयार रहेको उनले प्रतिबद्धता जनाए । महानिर्देशक ढकालले व्यापारमा मात्रै नभई परम्परागत आयुर्वेदिक ज्ञानको संरक्षण र विकास गर्ने कुरामा इमान्दारीता कायम राख्न तथा वस्तु र सेवा प्रवाहमा ध्यान दिन आग्रह गरे।आयुर्वेदिक औषधी व्यवसायीहरुलाई विषयगत प्रशिक्षणको पनि व्यवस्था गर्न लागिएको उनले जनाए।

कार्यक्रममा नेपाल आयुर्वेद क्याम्पसका प्रमुख शिव मंगल प्रसाद सिंहले आयुर्वेद नेपालको आफ्नो मौलिक पद्धतिका साथै संस्कृती र पहिचान पनि भएको बताए। “हामिले आफुलाई बिर्सिएर अन्यलाई मात्रै प्राथमिकता दिएर रुमल्लिदै छौं। हामिले आयुर्वेद पद्धतिलाई अन्य एलोपेथिक पद्धति सङ्ग समानान्तर रूपमा विकास गरेर लैजानुपर्छ। राज्यले यो कुरामा ध्यान नदिएर बेइमानी गरेको छ।”, उनले भने।

कार्यक्रमका सहभागीहरुले आयुर्वेदलाई राज्यले उचित नीति, नियम र आवश्यक जनशक्ति उत्पादन गरेर व्यवस्थित गर्न नसकेको औंल्याएका छन् । आयुर्वेद औषधीको अनलाइन बिक्री वितरणको नियमन , निरीक्षणमा औसधि व्यवस्था विभागले काम गर्नुपर्नेमा पनि उनीहरुले जोड दिए। आयुर्वेद औषधीको मुल्य समायोजन र गुणस्तरलाई मिलाएर लैजानुपर्ने , ऐनले नै १५% सम्म बढी भए पनि नेपाली उत्पादनलाई प्राथमिकता दिने प्रावधानलाई व्यवहारमा लैजान काम गर्नुपर्ने, आयुर्वेदको विकासका लागी आयुर्वेद फार्मेसी र सेवालाई देशका सबै ठाँउमा उपलब्ध हुने व्यवस्था गर्नुपर्ने उनीहरुले बताएका छन् ।

भक्तपुर जिल्लाका अध्यक्ष डा. असिम वैद्यले संचालन गरेक्क समुद्घाटन समारोहमा ललितपुर जिल्लाका अध्यक्ष डा. गोपाल दाहालले स्वागत मन्तव्य राखेका थिए। अधिवेशनले काठमाडौं , ललितपुर र भक्तपुर जिल्लाका नयाँ कार्यसमिति चयन गर्नेछ।