२६ जेठ , काठमाडौं । तारकेश्वर नगरपालिकाले ‘नगरप्रमुखसंग सञ्चारकर्मीको अन्तर्किया तथा अभिमुखिकरण’ कार्यक्रम सम्पन्न गरेको छ।

तारकेश्वर नगरपालिकाका निर्वाचित जनप्रतिनिधिहरुले गरेका विकास निर्माणका कामहरूका बारेमा स्पष्ट पार्नका लागि तथा पत्रकारहरुले सम्बन्धित विषयको समाचार लेखनका क्रममा ध्यान दिनुपर्ने कुराहरुको बारेमा विज्ञ प्रशिक्षकबाट अभिमुखिकरण प्रदान गर्ने उद्देश्यले कार्यक्रमको आयोजना गरिएको उक्त नगरपालिकाका प्रवक्ता एवं वडा न.-२ का अध्यक्ष राधाकृष्ण खड्गीले जानकारी दिए।

अभिमुखिकरण कार्यक्रममा प्रमुख अतिथि समेत रहेका तारकेश्वर नगरपालिकाका प्रमुख कृष्णहरि महर्जनले यस किसिमको अभिमुखिकरणले सत्यतथ्यमा आधारित भएर स्थानीय पालिकाका समाचार सम्प्रेषण गर्न सञ्चारकर्मीलाई मद्दत पुग्ने र त्यसबाट जनप्रतिनिधिलाई समेत आफ्ना कमी-कमजोरी सुधार गर्दै नागरिकका मुद्दाहरूको सम्बोधन गर्न सहयोग पुग्ने अवस्थाको निर्माण हुने विश्वास व्यक्त गरे।

नगरप्रमुख महर्जनले आफूँसमेत गलत र भ्रामक समाचारको सिकार बन्ने गरेको स्मरण गर्दै गलत समाचारको खण्डन समेत सञ्चारमाध्यमहरुले उपयुक्त किसिमले प्रकाशित नगर्ने अनुभव गरेको बताए ।

‘तारकेश्वर नगरपालिका सञ्चारकर्मीलाई सूचना दिने कुरामा सधैं प्रतिबद्ध छ। सञ्चारकर्मीले पनि आधिकारिक व्यक्तिसंग सम्पर्क गरेर सत्यतथ्यमा आधारित सूचना प्रवाह गर्नु आवश्यक छ’, उनले भने।

त्यस्तै , तारकेश्वर नगरपालिका स्वास्थ्य क्षेत्र तथा मानव विकास सुचांकमा काठमाडौं जिल्लामै उत्कृष्ट रहेको प्रमुख महर्जनले बताए । नगरपालिकाले सर्वाङ्गिण विकासको अवधारणा अन्तर्गत नागरिकका स्वास्थ्य , शिक्षा , रोजगार , वृत्तिविकास तथा पूर्वाधार निर्माणमा काम गरिरहेको उनले जानकारी दिए।

कार्यक्रममा प्राध्यापक शान्ताराम बिडारीले संचार जगतको नियामक निकाय प्रेस काउन्सिलले जारी गरेको पत्रकार आचारसंहिता सम्बन्धि अभिमुखिकरण प्रदान गरे। त्यस्तै , नागरिक दैनिकका आर्थिक डेस्क प्रमुख दिलिप पौडेल र गोरखापत्रका उपसम्पादक दीपक श्रेष्ठले पत्रकारिताका अन्य आयाम बारे प्रकाश पारेका थिए।

एक दिवसीय उक्त प्रशिक्षण कार्यक्रममा तारकेश्वर नगरपालिकाका प्रमुख महर्जन, उपप्रमुख सृजना बुर्लाकोटी आचार्य , प्रवक्ता राधाकृष्ण खड्गी, वडा नं.-३ का अध्यक्ष पर्शुराम अर्याल , प्रमुख प्रशासकिय अधिकृत किशोर प्रसाद आचार्य , प्रशिक्षक तथा पत्रकारहरुको सहभागिता रहेको थियो।