केवलकार बन्न नदिन पाथीभरा जान्छु: महतो
२८ माघ , काठमाडौं । पाथीभरामा निर्माण हुन लागेको केवलकारको विरोध गरिरहेको नो केवलकार समूहले वार्ताबाट समस्या समाधान गर्न सरकार इमानदार नभएको भन्दै आन्दोलनको घोषणा गरेको छ । सो समुहले सोमबार पत्रकार सम्मेलन गरी माघ २९ गतेदेखि आन्दोलन गर्ने जनाएको छ।
पत्रकार सम्मेलनमा संघर्ष समितिको तर्फबाट बोल्दै राष्ट्रिय मुक्ति पार्टी नेपालका अध्यक्ष तथा पुर्व उप प्रधानमन्त्री राजेन्द्र महतोले अब आफू ८ गते मुकुमलुङ पद यात्रा गर्ने बताएका छन । आन्दोलनको कार्यक्रम मध्ये फागुन ६ देखि ८ गतेसम्म ‘मुक्कुमलुङ बचाऔं पदयात्रा’ घोषणा गरिएको छ । उनले बोल्ने क्रममा भने, ‘८ गते समाजिक न्याय दिवस हो त्यस अवसरमा मुन्धुम सभ्यता, मुकुमलुङको न्यायको निम्ति म त्यहा जान्छु, तपाईंहरु पनि आउनुस र विशाल पद यात्रा गरौं । अब लिम्बू एक्लै लडदैन, अब कुनै समुदाय एक्ला एक्लै लडनु जरुरी छैन। डिभाइड एन्ड रुल अब चल्दैन । छुट्टाछुट्टै हैन, अब हामी मिलेर लडछौ।’
उनले अहिलेको सरकार निरंकुश तर्फ अघि बढेको बताए । बोल्न पाइदैन भन्ने आसयको कानुन ल्याउन खोज्दै छ, माघ १२ गते प्रहरीले सभ्यताको रक्षार्थ शान्तिपुर्ण संघर्ष गर्नेहरू उपर गोली चलाउने यी सबै निरंकुशताको उदाहरण भएको उनले बताए ।
माघ २७ गते बेलुकासम्म उच्चस्तरीय वार्ता टोली गठन गर्न गरेको माग सरकारले सम्बोधन नगरेकाले फेरि आन्दोलनका कार्यक्रम घोषणा गर्नुपरेको महतोले बताए। अबको आन्दोलन अझै ससक्त हुने उनले बताए ।
आन्दोलनकारीले केबलकारको अनुमति तथा सम्झौता खारेजीका लागि दबाब दिन फुङलिङ नगरपालिकाको कार्यालय घेराउ, केबलकार निर्माण सामग्री ढुवानी नगर्न आग्रह, काठमाडौं, इटहरी र बिर्तामोडमा विरोध सभा गर्ने भएका छन्।
यससँगै केबलकारको सम्झौता खारेजीका लागि कोशी प्रदेशका सबै जिल्ला प्रशासन कार्यालय मार्फत ज्ञापनपत्र बुझाउने, प्रदर्शन गर्ने पनि उनीहरूले तय गरेका छन्। त्यसपछि अनिश्चितकालीन यातायात बन्द र आमहडताल गर्ने चेतावनी दिएका छन्।