१३ वैशाख , काठमाडौं । काठमाडौं मुद्रण उद्योग संघले आफ्ना सदस्यहरुको लागि पेशागत सशक्तीकरण तथा ‘मोटिभेसनल वर्कशप’ को आयोजना गरेको छ। संघका अध्यक्ष दुर्गा प्रसाद ढकालको सभापतित्व र नेपाल उद्योग वाणिज्य महासंघका उपाध्यक्ष हेमराज ढकालको प्रमुख आतिथ्यमा शनिबार बुद्धनगरको क्वालिटी ब्यांकेटमा सम्पन्न समारोहमा नयाँ वर्ष २०८२ को शुभकामना आदानप्रदान र क्यालेन्डर सार्वजनिक पनि गरिएको थियो । कार्यक्रममा मुद्रण उद्योग महासंघका अध्यक्ष विष्णु प्रसाद तिवारी , बागमती प्रदेश मुद्रण उद्योग संघका अध्यक्ष उदय वादे श्रेष्ठ , मुद्रण उद्योग व्यवसायी लगायतको उपस्थिति रहेको थियो ।

‘वर्कशप’ मा संगम महतले व्यक्तिगत तथा व्यवसायीक जीवनका लागि विशेष ‘मोटिभेसनल’ प्रस्तुति दिएका थिए।

कार्यक्रमका प्रमुख अतिथि नेपाल उद्योग वाणिज्य महासंघका उपाध्यक्ष हेमराज ढकालले मुद्रण उद्योग संघका समस्या समाधान गर्न उद्योग वाणिज्य महासंघले पहल गर्ने प्रतिबद्धता जनाए । उनले निजी क्षेत्रको समग्र विकासको लागि नीति, नियममा समयसापेक्ष सुधार हुनुपर्ने र युवा पलायन रोक्नका लागि दक्षता अभिवृद्धि र आइटि जस्ता नयाँ उद्योगको प्रवर्द्धन गर्नु आवश्यक रहेकोमा जोड दिए ।

मुद्रण उद्योग महासंघका अध्यक्ष विष्णु प्रसाद तिवारीले सबैभन्दा धेरै समस्या मुद्रण उद्योगभित्र नै रहेका हुनाले ती कुराहरु पहिले समाधान गर्नु आवश्यक रहेको बताए । व्यवसायीहरुबीचको एकता कायम गर्दै अस्वस्थ प्रतिस्पर्धाको अन्त्य गर्नुपर्नेमा उनले जोड दिए।

कार्यक्रममा काठमाडौं मुद्रण उद्योग संघका अध्यक्ष दुर्गा प्रसाद ढकालले मुद्रण व्यवसायीहरुको क्षमता कमजोर हुँदै गएको, बजारमा कामको अभाव भएको, दक्ष कर्मचारी र मजदुरको अभाव हुन थालेको जस्ता समस्याहरुबीच मुद्रण उद्योगलाई कसरी संचालन गर्ने भन्ने चिन्ता र चुनौतीको विषय भएको बताए । यी कुराहरुलाई मुद्रण उद्योगीहरुले मात्रै समाधान गर्न नसक्ने हुनाले राज्यले नीतिगत रूपमा सम्बोधन गर्न आवश्यक भएको उनले उल्लेख गरे।

उनले तयारी सामान आयात गर्दा कर नलाग्ने तर व्यवसायीले उद्योगका लागि कच्चा पदार्थ आयात गर्दा धेरै कर लाग्ने अव्यावहारिक कर नीतिलाई राज्यले सच्चाउनुपर्नेमा जोड दिए । त्यस्तै , मुद्रण उद्योग व्यवसायीहरूले पनि आफ्ना कमिकमजोरी हटाएर काम गर्न आव्हान गरे।