आगलागी जोखिम न्यूनीकरण तथा विद्युतीय सुरक्षा प्रविधिसम्बन्धि अन्तर्राष्ट्रिय सम्मेलन नेपालमा हुने

• १५ फागुन ,काठमाडौं। आगलागी सम्बन्धी जोखिम न्यूनीकरण तथा विद्युतीय सुरक्षा प्रविधिको प्रवर्द्धन तथा स्थानीय स्तरमा जनचेतना अभिवृद्धिसम्बन्धि अन्तर्राष्ट्रिय सम्मेलन तथा प्रदर्शनी नेपालमा हुने भएको छ।

एशिया प्यासिफिक सेक्युरिटी एशोसिएसन, नेपाल च्याप्टर (आप्सा नेपाल ) ले यहि चैत्र २४ र २५ गतेका दिन दरबार मार्ग स्थित होटल याक एण्ड यतिमा “Fire Safety & Electronic Security International Conference and Exhibition (FSESICE) 2025” आयोजना गर्न गइरहेको बिहीवार आयोजित पत्रकार सम्मेलनमा जानकारी दिइएको हो।

आप्सा नेपालका अध्यक्ष सुनिल कुमार यस सम्मेलनमा गृह मन्त्रालय, सहरी विकास मन्त्रालय, नेपाल प्रहरी, सशस्त्र प्रहरी, नेपाली सेना, स्थानीय तहका ७५३ पालिकाहरु, अन्तर्राष्ट्रिय विशेषज्ञहरू, उद्योगका नेताहरू, तथा आगलागी तथा इलेक्ट्रोनिक सुरक्षासम्बन्धी विज्ञहरूको सहभागिता रहने जानकारी दिएका छन् ।

त्यस्तै ,अन्तर्राष्ट्रिय अग्नि सुरक्षा तथा इलेक्ट्रोनिक सुरक्षा सम्मेलन एवं प्रदर्शनी २०२५ ले सहभागीहरूलाई आगलागी तथा सुरक्षा प्रणालीसँग सम्बन्धित नवीनतम प्रविधि, प्रवृत्ति, र उत्कृष्ट अभ्यासहरूबारे जानकारी दिने सुनौलो अवसर प्रदान गर्ने उनले जानकारी दिए। सम्मेलनमा विभिन्न १४ राष्ट्रहरू- चीन, हङकङ, इन्डोनेसिया, भारत, जापान, मकाउ, मलेसिया, फिलिपिन्स, सिंगापुर, दक्षिण कोरिया, श्रीलङ्का, वाइल्याण्ड, भियतनाम) का मुख्य वक्ताहरू, छलफल सत्रहरू, तथा प्रदर्शनीहरू समावेश हुने उनले बताए ।

आप्सा नेपालका महासचिव मधु सुदन थापाले सम्मेलनमा सहभागीताको लागि दर्ता खुलाइ सकेको र १८ मार्च, २०२५ (५ चैत्र, २०८१) अघि सहभागीता दर्ता गर्ने सहभागीहरूका लागि प्रारम्भिक पक्ष छुटहरू उपलब्ध हुने जानकारी दिए ।

पत्रकार सम्मेलनमा आप्सा नेपालका कार्यक्रम निर्देशक सुरेश श्रेष्ठ , गाउँपालिका राष्ट्रिय महासंघ नेपालका कार्यकारी निर्देशक राजेन्द्र कुमार प्याकुरेल लगायतले सम्मेलनको महत्त्व बारे प्रकाश पारेका थिए।

यस्ता छन् सम्मेलनको उद्देश्य:

आयोजकका अनुसार आगलागीको समस्या नेपालको प्रमुख चुनौतीहरू मध्ये एक हुन् । हरेक वर्ष आगलागीका घटनाहरूले जनधनको ठूलो क्षति पुर्याउँदै आएको, जसको सामना गर्नका लागि सरकार तथा स्थानिय तहले गरेका प्रयास प्रभावकारी भएपनि समुदाय स्तरमा थप सचेतना र नवीन समाधानहरू प्रवाह गर्ने उद्देश्यका साथ यस सम्मेलको आयोजना गरिएको छ। अतः यस सम्मेलनको मुख्य  उद्देश्य यस प्रकारका छन्-

• अग्नि सुरक्षा एवं इलेक्ट्रोनिक सुरक्षा सम्बन्धी ज्ञान, प्रविधि, सूचना, विचार, समाधानको आदान प्रदानका लागि सबै सुरक्षाकर्मी, सम्बन्धित कर्मचारीहरूलाई एउटै छानामुम्न्नि ल्याएर अन्तरक्रियाको मञ्च निर्माण गर्ने ।

• सरकारी अधिकारी र निजी कम्पनीहरूको ध्यानाकर्षण गर्ने र दैनिक सञ्चालनमा अग्नि सुरक्षा एवं इलेक्ट्रोनिक सुरक्षा बारे सचेत गराउने ।

• अग्नि सुरक्षा एवं इलेक्ट्रोनिक सुरक्षा व्यवस्थापनमा नियामक अनु‌पालन, मापदण्डहरू, र उत्कृष्ट अभ्यासहरू छलफल गर्न फोरम प्रदान गर्ने ।

• अग्नि सुरक्षा एवं इलेक्ट्रोनिक सुरक्षा प्रविधिहरू र समाधानहरूमा नवीनतम प्रगतिहरू अन्वेषण गर्ने ।

• अग्नि सुरक्षा एवं इलेक्ट्रॉनिक सुरक्षा उद्योगमा प्रमुख चुनौती र अवसरहरू सम्बोधन गर्ने ।

• स्थानीय समुदायहरूमा अग्नि सुरक्षा एवं इलेक्ट्रॉनिक सुरक्षा उपायहरू र रोकथाम रणनीतिहरू बारे चेतना जगाउने ।